FBI-ja dhe as Prokuroria Speciale s’japin detaje për hetimin e sulmit në Ibër-Lepenc

Është bërë një vit kur me 20 kilogramë eksplozivë është shpërthyer kanali i ujit në Ibër-Lepenc. Për këtë sulm hetimet edhe po vazhdojnë, si nga autoritetet vendore ashtu edhe ato ndërkombëtare. Në FBI thanë se informacione duhet kërkuar tek institucionet e Kosovës, por në Prokurorinë Speciale refuzuan të ofrojnë detaje. E ekspertë të fushës dhe avokatë kanë shtruar nevojën që Prokuroria të jetë më transparente dhe që hetimet të zhvillohen bazuar në prova

Edhe kur është bërë një vit nga sulmi terrorist mbi kanalin e Ibër-Lepencit në fshatin Varagë të Zubin-Potokut, nuk ka një aktakuzë për përgjegjësit dhe as informacione se kush qëndron pas sulmit.

Lidhur me shpërthimin në të cilin u përdorën 20 kilogramë eksplozivë, janë arrestuar dy persona që po mbahen në paraburgim nga fillimdhjetori i kaluar. Teksa nuk është ngritur aktakuzë, hetimet po zhvillohen nga autoritetet vendore dhe ato ndërkombëtare.

Në Prokurorinë Speciale thanë se këto hetime po vazhdojnë, në përputhje me afatet ligjore.

“Prokurori kompetent është duke i ndërmarrë të gjitha veprimet e nevojshme hetimore, brenda afateve të arsyeshme ligjore”, ka thënë Arbnora Luta, zyrtare për komunikim me publikun në këtë prokurori.

Pas shpërthimit të 29 nëntorit të 2024-tës, në Shtetet e Bashkuara konfirmuan se në hetime janë përfshirë edhe agjentë të Byrosë Federale të Hetimeve.

Në këtë institucion nuk u janë përgjigjur pyetjeve të KOHËS lidhur me hetimet teksa thanë se informacionet duhet të kërkohen nga autoritetet vendore.

“Ju referojmë tek autoritetet e Kosovës”, thuhet në përgjigjen e FBI-së.

Ndonëse hetimet janë ende në zhvillim, avokati Arbër Jashari thekson se institucionet në Kosovë do të duhej që t’i zbardhin të paktën ato informacione që nuk e rrezikojnë procesin hetimor.

“Mbase Prokuroria Speciale do të duhet të japë disa informata bazike, të cilat nuk do t’i kishin cenuar hetimet, thjesht vetëm rreth veprimeve që janë ndërmarrë, dhe nëse ka pasur diçka konkrete lidhur me kryesit e veprës penale, motivin e kryerjes dhe rrethana të tjera, të cilat janë të nevojshme dhe të domosdoshme që të dihen për këtë çështje”, ka thënë Jashari.

E në Institutin e Kosovës për Drejtësi kërkuan që Prokuroria të jetë profesionale dhe që hetimet të jenë të bazuara në prova.

“Në bazë të Kodit të Procedurës Penale, në bazë të Kodit Penal të Kosovës, së paku do të thotë, janë dy vjet kohë për hetime nga ana e Prokurorisë. Ka kaluar vetëm një vit, por me vetë faktin që kemi në paraburgim dy veta, do të duhej që Prokuroria ta trajtojë këtë rast me më shumë efikasitet, në mënyrë që të zbardhet i plotë ky rasti sa më shpejt që është e mundur”, ka thënë Ehat Miftaraj, drejtor ekzekutiv i këtij instituti.

Në Qeveri nuk janë përgjigjur lidhur me pyetjet mbi informacionet që i posedon rreth hetimeve të rastit qoftë nga institucionet vendore apo nga ato ndërkombëtare.

Për sulmin mbi infrastrukturën kritike të shtetit në paraburgim janë vëllezërit Jovan dhe Dragisha Viçentijkeviq. Sipas kërkesës së Prokurorisë për caktimin e masës së paraburgimit, i dyshuari Jovan Viqentijeviq, në bashkëkryerje me të vëllain Dragisha, qëllimisht kanë dëmtuar pajisjet publike të ujësjellësit dhe kanë kryer veprën penale të terrorizmit, duke përdorur eksploziv dhe mjete shpërthyese drejtpërdrejt në pjesën e kanalit.

Dëmi i shkaktuar nga ky sulm është vlerësuar të jetë rreth 400 mijë euro.