Në një bashkëbisedim në podcastin PIKË me publicistin Veton Surroi, inxhinieri Agron Dida ka rrëfyer detaje mbi procesin e tenderimit për telefoninë mobile në Kosovë në fillim të viteve 2000, duke pretenduar se aty ka nisur “manifestimi më i fuqishëm i korrupsionit të rëndë” në Postën dhe Telekomin e Kosovës (PTK).
Sipas Didës, përgatitja e tenderit për operatorin mobil ishte kundërshtuar nga përfaqësues të UNMIK-ut, të cilët, siç tha ai, kishin arsyetuar se “nuk ka kushte” për një proces të tillë. Ai theksoi se kishte pasur ide që telefonia mobile e Serbisë të zgjerohej në Kosovë, por ai kishte qenë kategorikisht kundër.
Dida tregoi se në garë kishin marrë pjesë disa kompani ndërkombëtare, përfshirë “Siemens” nga Austria dhe “Alcatel” nga Franca, ndërsa “Motorola” ishte tërhequr nga procesi. Ai shpjegoi se kishte formuar një komision vlerësues prej pesë anëtarësh – jurist, ekonomist, inxhinier dhe nga një përfaqësues të KFOR-it dhe UNMIK-ut – për të garantuar transparencë.
Sipas tij, komisioni kishte vendosur unanimisht që “Siemens” të shpallej fitues i tenderit, por dy përfaqësuesit ndërkombëtarë nuk e kishin nënshkruar dokumentin e vlerësimit.
“Por unë e shpalla zyrtarisht “Siemensin” fitues”, ka treguar ai.
Ai pretendon se pas kësaj ishte larguar nga detyra në mënyrë arbitrare nga administratori i atëhershëm i Kosovës, Kouchner, me arsyetimin për “mungesë të vazhdueshme bashkëpunimi”. Sipas tij, më pas kontrata ishte nënshkruar me “Alcatel” dhe ishte përfshirë edhe Monaco Telecom në sistemin e faturimit.
Dida hodhi akuza të rënda për përpjekje për korrupsion, duke deklaruar se i ishin ofruar shuma milionëshe parash dhe madje një pronë në Monako në këmbim të nënshkrimit të kontratës me “Alcatel”.
Ai gjithashtu kritikoi mungesën e mbështetjes nga Qeveria e Përkohshme e asaj kohe, duke thënë se mosreagimi institucional hapi rrugën për degradimin e PTK-së.
