Beteja për pronën 7-hektarëshe (3): Paditet Agjencia e Pyjeve, kallëzim penal ndaj kryetarit të Podujevës dhe tre zyrtarëve

Dy padi dhe 1 kallëzim penale janë drejtuar në organet e drejtësisë për pronën 7 hektarshe pranë digës së Liqenit të Batllavës.

Kompania “Sirius”, përmes dy padive ka kërkuar anulim të vendimit të Agjencisë së Pyjeve që pak muaj më parë i ka anuluar kontratën për qiradhënie dhe kompensim të dëmit për fitimin e humbur.

Krahas padive, për anulim të kontratës së dhënë dy vjet më parë, ajo ka bërë kallëzim penal ndaj kryetarit të Komunës së Podujevës, Shpëtim Bulliqi, dhe ish-drejtorit të Urbanizmit, Bujar Hasani për anulim të pëlqimit për rinovim të kompleksit si dhe zëvendës drejtorit të APK-së, Bekim Hoxhës dhe ndaj Besim Zogut, drejtori i Inspeksionit për Pylltari dhe Gjueti.

Kryetari i Komunës, Shpejtim Bulliqi, ka thënë se anulimi i pëlqimit u bë pasi ai kishte kërkuar rishqyrtim të lëndës. Ai hedh dyshime për dhënien e pëlqimit, ani se ai pëlqim është dhënë nga vartësi i tij, Bujar Hasani.

Por, ish-drejtori i Urbanizmit, Bujar Hasani, ka thënë se pëlqimin e ka dhënë në bazë të rekomandimeve të komisionit, ndërsa anulimi nuk është bërë nga ana e tij.

“Unë nga nëntori i 2021 nuk jam pjesë e drejtorisë dhe nuk e di kush e ka anuluar pëlqimin, do të duhej që vendimi të kishte emër”, ka thënë Bujar Hasani, ish-drejtor i Urbanizmit.

Në vendimin për anulim të pëlqimit të datës 12 janar të këtij viti, nuk figuron emri i drejtorit, përveç nënshkrimit, e për të cilin nga komuna nuk kanë sqaruar se i kujt është.

Sipas informatave zyrtare, drejtori i ri i Urbanizmit, Leutrim Krasniqi, e kishte marrë detyrën më 7 shkurt.

Pas anulimit të pëlqimit nga komuna, ishte anuluar edhe kontrata e Siruisit me Agjencinë e Pyjeve, për çka kjo e fundit ka paditur Agjencinë dhe ka ushtruar kallëzim penal ndaj zëvendëskryeshefit Bekim Hoxha.

Hoxha ka thënë se Agjencia i është përgjigjur në padi dhe do t’i ndjekë të gjitha procedurat ligjore. E për kallëzim penal thotë se u mbetet organeve të drejtësisë të trajtojnë këtë çështje.

Ndërsa Besim Zogu ka thënë se nuk mund të flasë për këtë çështje, pasi nuk është i autorizuar.

Lidhja e kontratës për pronën 7-hektarëshe, në kuadër të së cilës është një kompleks me disa shtëpiza, tashmë po hetohet edhe nga organet e hetuesisë.