Në emisionin “60 Minuta” në KTV sot në kuadër të intervistës flasim për mënyrën se si Komuna e Prishtinës nis me gjobitjen e veturave, pasi kryetari Përparim Rama tha se është rikthyer funksionalizimi i “Prishtina Parkingut”.
A ishte kjo forma e duhur e nisjes së gjobitjes pas vendimit të Gjykatës Supreme e cila kërkonte ndryshimin e neneve që ishin shpallur të kundërligjshme?
Me shefin e asamblistëve të Lëvizjes Vetëvendosje në Komunën e Prishtinës, Gëzim Sveclën flasim për problemet e implementimit të kësaj rregulloreje pa kaluar përmes Kuvendit Komunal, kapacitetin e inspektoratit të komunës për të mbikëqyrur dhe menaxhuar parkingjet.
Me Sveçlën flasim edhe për garën për kryetar të Prishtinës në kohën kur na ndajnë vetëm disa ditë nga nisja e fushatës për zgjedhjet lokale?
Pse kandidati i Vetëvendosjes Hajrullah Çeku nuk ka dhënë dorëheqje nga pozita e ministrit në detyrë tashmë kur po nis fushata për zgjedhje?
Pse Çeku nuk është bartës i listës së Vetëvendosjes për Prishtinë?
A ka shumë projekte që janë penguar nga niveli qendror për kryeqytetin?
Cili është plani që Vetëvendosje ka për sheshin Xhorxh Bush?