Sulmet me dronë dhe raketa kanë goditur disa zona të Ukrainës të shtunën, duke plagosur të paktën nëntë persona, ndërsa Kievi dhe Moska po përgatiten për një raund të ri bisedimesh javën e ardhshme me ndërmjetësimin e Shteteve të Bashkuara të Amerikës.
Negociatorët nga Rusia, Ukraina dhe SHBA-ja pritet të takohen të martën në Abu Dhabi, kryeqytetin e Emirateve të Bashkuara Arabe, në përpjekje për t'i dhënë fund luftës. Ky do të jetë raundi i katërt i negociatave të ndërmjetësuara nga administrata e presidentit amerikan Donald Trump, ndërsa takimi i fundit ishte mbajtur në Gjenevë në muajin shkurt. Qeveritë perëndimore që mbështesin nismën e paqes po kërkojnë një formulë të re për të kapërcyer ngërçin në negociata, megjithëse çështjet territoriale dhe ato të sigurisë mbeten ende të pazgjidhura.
Raketat ruse goditën gjatë natës kryeqytetin ukrainas, Kiev, duke dëmtuar banesa dhe objekte afariste, si dhe duke shkaktuar ndërprerje të reja të energjisë elektrike dhe furnizimit me ujë. Autoritetet kombëtare dhe ato lokale konfirmuan dëmet. Sulmet detyruan gjithashtu autoritetet të mbyllnin Urën Veriore të Kievit, e gjatë 816 metra, një nga rrugët kryesore që lidh qytetin me zonat e mëdha të banimit në bregun lindor të lumit Dnipro.
Kateryna Korniichuk, 64 vjeçe, e cila ndodhej në shtëpi me mbesën e saj gjatë sulmit, përshkroi momentet e tmerrit për agjencinë Associated Press. Ajo tha se vala goditëse nga shpërthimi i kishte përplasur ato fillimisht në njërën mur dhe më pas në tjetrin, ndërsa ndodheshin në korridor. “Është shumë e vështirë. Nuk ka gjumë, nuk ka qetësi, asgjë. Fëmijët nuk flenë dhe as ne. Unë jam e moshuar dhe mund ta përballoj, por çfarë kanë bërë gabim fëmijët?”, deklaroi ajo.
Kryetari i Kievit, Vitali Klitschko, bëri të ditur se kishin nisur punimet për riparimin e Urës Veriore dhe se presioni i ujit në qytet ishte stabilizuar. Më herët, ai e kishte cilësuar situatën energjetike në kryeqytet si “jashtëzakonisht të vështirë”, duke theksuar se sulmet kishin ndikuar në sistemet e ngrohjes dhe furnizimit me ujë.
Presidenti ukrainas, Volodymyr Zelenskyy, deklaroi se Rusia po përgatitej për bisedimet trepalëshe duke goditur infrastrukturën kritike të Ukrainës me raketa balistike. Ai tha se Moska po intensifikonte sulmet për të ushtruar presion ndaj Kievit përpara takimit në Abu Dhabi. Sipas Zelenskyyt, Rusia kishte lëshuar gjatë natës 36 raketa balistike drejt Kievit dhe rajonit përreth, por vetëm katër prej tyre ishin rrëzuar, për shkak të mungesës së raketave penguese Patriot. Ai shtoi se, sipas gjetjeve paraprake nga hetimet në vendet e goditjes, Rusia kishte përdorur edhe raketa balistike të prodhimit të Koresë së Veriut për të goditur objektet energjetike.
Në total, sipas presidentit ukrainas, sulmi përfshiu 172 dronë që shënjestruan Kievin dhe 12 rajone të tjera të Ukrainës, duke lënë të plagosur nëntë persona, mes tyre edhe një fëmijë. Zelenskyy e cilësoi qasjen e Moskës ndaj diplomacisë si një formë tjetër të agresionit, duke theksuar se sulmet po vazhdojnë edhe në prag të përpjekjeve të reja për arritjen e një marrëveshjeje paqeje.