-
Traduit par : Flutura Gashi-Mehmeti
- 5 novembre 2026 08h20
- Partager à:
Joshua Wong, dikur figura kryesore e lëvizjes për demokraci në Hong Kong, është dënuar me 10 vjet burgim për bashkëpunim me forca të huaja, në bazë të ligjit gjithëpërfshirës të sigurisë kombëtare të qytetit.
Wong është njëri prej qindra aktivistëve dhe qytetarëve të zakonshëm të Hong Kongut të arrestuar në bazë të këtij ligji, i cili u vendos në vitin 2020, pas protestave masive pro-demokracisë kundër rritjes së kontrollit të Pekinit.
Kritikët thonë se ligji me shtrirje të gjerë ka heshtur zërat kundërshtues, ndërsa autoritetet argumentojnë se ai është i nevojshëm për ruajtjen e stabilitetit dhe mohojnë se ka dobësuar autonominë e çmuar të qytetit.
Pasi ka kaluar tashmë gjashtë vjet në burg, Wong, i cili pritej të lirohej në janar, do të qëndrojë tani edhe një dekadë tjetër prapa grilave.
E heshtur tashmë, dekada e protestave në Hong Kong tani mbetet një kujtim sfidues.
Wong, i cili ka mbushur 30 vjeç muajin e kaluar, është burgosur disa herë për shkak të aktivizmit të tij, të cilin e nisi që në adoleshencë.
Të enjten, ai mbërriti në gjykatë dhe dukej më i dobët krahasuar me paraqitjet e tij të mëparshme publike.
Ai përshëndeti me kokë disa nga personat në sallën e mbushur të publikut dhe herë pas here mbante shënime, ndërsa gjyqtari lexonte arsyetimin e vendimit për dënimin e tij.
Wong tashmë po vuan një dënim për përmbysje të pushtetit dhe pritej të lirohej në fillim të vitit të ardhshëm, kur ndaj tij u ngritën akuzat e fundit, për të cilat ai u deklarua fajtor në fillim të shtatorit.