-
Traduit par : Flutura Gashi-Mehmeti
- 11 novembre 2026 10h51
- Partager à:
Sekretari amerikan i Shtetit, Marco Rubio kishte informuar Trumpin për dyshimet se drejtori ekzekutiv i Nvidia-s, Jensen Huang, kishte një lidhje jashtëmartesore me një grua të dyshuar si spiune kineze, gjatë udhëtimit të presidentit amerikan në Kinë në maj, ka raportuar CNN, duke cituar një burim në dijeni të çështjes.
Sipas burimit, çështja ishte diskutuar në bordin presidencial Air Force One, përpara se Huang t’i bashkohej Trumpit dhe zyrtarëve të lartë amerikanë në pjesën e fundit të udhëtimit drejt Pekinit, pas një ndalese në Alaskë.
Trumpi e ka mohuar të hënën se kishte pasur dijeni për këto dyshime në atë kohë. Ai ka thënë se kishte mësuar për rastin së fundmi dhe se FBI-ja po e hetonte çështjen.
Presidenti ka minimizuar zbulimet për lidhjen e Huangut me Alice Huang, një drejtuese në një kompani teknologjike me seli në Singapor, për të cilën inteligjenca amerikane ka arritur në përfundimin se është spiune kineze. Dy personat nuk kanë lidhje familjare.
“Unë vërtet i besoj”, ka thënë Trumpi për drejtorin e Nvidia-s, duke shtuar se besonte pretendimin e tij se nuk kishte pasur dijeni për operacionin e dyshuar të spiunazhit.
Megjithatë, sipas CNN-it, dyshimet për Alice Huang ishin ngritur nga FBI-ja rreth një vit më parë.
Agjentët kishin paralajmëruar ligjvënësit se Jensen Huang mund të ishte objektiv i një operacioni të inteligjencës së huaj, për shkak të marrëdhënies së tij të afërt me të. Hetuesit kishin vënë re gjithashtu se Alice Huang kishte papritur një fuqi të pazakontë blerëse për dikë në pozitën e saj.
Në maj, një memorandum i klasifikuar, i mbikëqyrur nga sekretari i Shtetit, Marco Rubio, paralajmëronte për lidhjen e Huangut me gruan që SHBA-ja tashmë e konsideron spiune kineze.
Dokumenti iu shpërnda një grupi të kufizuar zyrtarësh të lartë përpara vizitës së Trumpit në Kinë.
Sipas burimit të CNN-it, presidenti u informua për shqetësimet gjatë atij udhëtimi, por nuk ndërmori ndonjë veprim të dukshëm për t'u distancuar nga Huang. Përkundrazi, ai këmbënguli që drejtori i Nvidia-s t'i bashkohej delegacionit amerikan.
Zhvillimet kanë ngritur shqetësime serioze për sigurinë kombëtare dhe ekonomike të SHBA-së, veçanërisht për mundësinë që Pekini të ketë siguruar informacione mbi industrinë amerikane të inteligjencës artificiale dhe teknologjinë e avancuar të gjysmëpërçuesve.
Të hënën, zyrtarë të lartë të administratës Trump janë takuar me të ashtuquajturin “Grupi i Tetëshes”, i përbërë nga ligjvënësit përgjegjës për mbikëqyrjen e agjencive amerikane të inteligjencës. Në takim janë diskutuar informacionet për lidhjen e Huangut dhe dyshimet për spiunazh.
Demokratët kanë thënë se do të nisin hetime të shumta pasi të marrin kontrollin e Kongresit në janar.
Ata kërkojnë të sqarojnë se çfarë dinte administrata dhe nëse vendimet për eksportin e çipave të avancuar drejt Kinës mund të jenë ndikuar ose komprometuar.
“Eksporti i gjysmëpërçuesve të avancuar në Kinë ose në vende ku ajo mund të ketë qasje në to është çështje me rëndësi të jashtëzakonshme për sigurinë kombëtare”, ka thënë Jim Himes, demokrati më i lartë në Komitetin e Inteligjencës të Dhomës së Përfaqësuesve.
Edhe republikanët kanë kërkuar sqarime nga Nvidia. Tre ligjvënës republikanë i kanë kërkuar Huangut të marrë pjesë në një seancë informuese konfidenciale këtë muaj.
Huang, i cili bashkëthemeloi Nvidia-n dhe e shndërroi atë në një nga kompanitë më të vlefshme në botë, ka pasur ndikim të madh në politikat e administratës Trump për inteligjencën artificiale. Ai ka kërkuar vazhdimisht lehtësimin e kufizimeve për shitjen e çipave të avancuar amerikanë në Kinë.
Nvidia ka njoftuar se do të zhvillojë hetimin e vet për sjelljen e drejtorit ekzekutiv, por ende nuk dihet nëse bordi i kompanisë do të shqyrtojë mundësinë e shkarkimit të tij.
Një vendim i tillë do të kishte pasoja të mëdha, pasi Huang konsiderohet figurë e pazëvendësueshme në kompaninë që furnizon çipat kryesorë në qendër të bumit global të inteligjencës artificiale.