Është festa kryesore e filmit në kryeqytet që mbledh akterë vendorë e ndërkombëtarë të botës së filmit. Edicioni i 15-të i “Prishtina International Film festival” ka nisur të martën.
Është hapësirë prej ku tash e 15 vjet dalin bashkëprodhime të projekteve kinematografike, diskutohet për industrinë e krijohen lidhje midis akterëve vendorë e ndërkombëtarë. Por “Prifest” shkon përtej kësaj. Është festival që sjell edhe frymë të kinematografisë. Tash e dy vjet vazhdimisht, vjen edhe si ngjarje përkujtimore për themeluesen e producenten Vjosa Berisha, e cila vdiq vitin e kaluar.
Portretet e saj janë në hapësirat e jashtme dhe të brendshme të Festivalit, bashkë me motot “For her” dhe “Vjosa Forever”. Ceremonia edhe ka nisur si përkushtim për të me lojën e Alban Nimanit e Dren Abazit.
Si një Festival që nuk sjell veç filma, “PriFestin” e ka përshkruar kryetari i Prishtinës, Përparim Rama.
E më pas ka qenë koha që të pranishmit të jenë përballë ekranit të madh të “Kino Armatës”. “The Land Within” e ka hapur Festivalin si film garues në kategorinë e filmave të gjatë artistikë, një prej 9 kategorive të ngjarjes.
Filmi nën regji të Fisnik Maxville, bashkëprodhim midis Zvicrës dhe Kosovës bashkon një kastë aktorësh me renome si Luana Bajrami e Florist Bajgora, të cilët edhe bartin rolet kryesore. E kaluara e pasojat e saj, që caktojnë edhe të ardhmen, janë boshti i filmit. Një varrezë masive pas luftës së fundit në Kosovë bën që aty pos mihjes për trupa të pajetë, të rrëmohen edhe shumë histori.... Deri tek ato të pasardhësve të çifteve midis shqiptarëve dhe serbëve. Është asi filmi që gërmon te ndjesia e njerëzve që kanë kaluar në rrethana të rënda. Mbi të gjitha sjell para publikut pyetjen e personazhit kryesor Remos, se kujt i përket ai. E këtë e ka elaboruar edhe regjisori i filmit, me të cilin vitin e kaluar ka fituar dy çmimet kryesore në “Tallin Black Nights Film Festival”.
Florist Bajgora ka barrën e një personazhi që është fryt i një dashurie midis shqiptarëve dhe serbëve. Prindërit e tij ishin vrarë, përderisa për shqiptarët është veç serb.
Prej 12 deri me 17 shtator në nëntë kategori garuese festivali sjell rrëfime të ndryshme, përfshirë edhe filma që janë kandidatë shtetërorë për t’u nominuar për “Oscar”. Ndërsa debatet do të plotësojnë mozaikun e “PriFest”, që edhe sivjet synon ta ruajë shkëlqimin e nisur para një dekade e gjysmë.
© KOHA. Të gjitha të drejtat janë të rezervuara.
