Është jo fort e zakontë edhe për skenat më të mëdha botërore të tingëllojnë “Gjashtë suitat për violonçel” nga Johann Sebastian Bach. Edhe më, të luhen në kitarë. E jashtë krejt kufijve të së zakonshmes ishte nata e së enjtes në sallën e Muzeut të Mitrovicës, dhe ajo e së shtunës në katedralen “Zoja Ndihmëtare” në Prizren kur në skenë u ngjit kitaristi shqiptar i njohur botërisht, Petrit Çeku.
Suitat e Bachut janë të njohura për kompleksitetin e tyre teknik dhe për thellësinë emocionale. Shfaqin kuptimin e tij të thellë të formave muzikore dhe aftësinë për të ngjallur një larmi emocionesh. Interpretimi i tyre në kitarë nga Petrit Çeku e çoi publikun në një udhëtim që nis me momente të gjalla dhe plot hare e deri tek pasazhet introspektive dhe melankolike, duke kapur thelbin e emocionit dhe përvojës njerëzore. Në njëfarë forme, koncerti ka qenë edhe homazh për maestron Valter Deshpali, që ka i ka transkriptuar për kitarë suitat e Bachut.
Petrit Çeku konsiderohet si një nga kitaristët më të mëdhenj të gjeneratës së tij. Ekspresiviteti i tij ka tërhequr audiencën në mbarë botën. Suitat për violonçel të Bachut janë kthyer në monument dhe shpesh “vizitohen” nga violonçelistë e kitaristë. Çeku jep një interpretim të mahnitshëm të tyre.
Në paralajmërimin e tij për koncertet në Kosovë ai kishte thënë se e kishte dëshirë të kamotshme që projektin e tij shumëvjeçar ta sillte edhe në Kosovë.
Me po aq dëshirë edhe u organizua pritja e Çekut në Komunën e Mitrovicës.
“Natyrisht që siç po vërehet jam akoma me shumë emocione. Me të vërtetë ishte natë magjike dhe që nga fillimi kur kam kontaktuar me Dardanin, kur kemi folur për ta sjellë Petrit Çekun në Mitrovicë. Kemi bërë çmos si komunë që kjo natë të ndodhë. Sonte veç u pa edhe nga audienca edhe nga e tërë magjia që na e dhuroi , gjithë ato emocione. Me të vërtetë ka kohë që nuk jam ndier më shumë e emocionuar se sonte. Jam jashtëzakonisht mirënjohëse vet Petritit dhe gjithë atyre që kanë ndihmuar që të organizohet ky koncert sonte”, tha Valdete Idrizi.
Organizimi i këtij koncerti në Ditën Ndërkombëtare të Muzeve u kthye në një rastësi të bukur për stafin e Muzeut të Mitrovicës. Udhëheqësja e sektorit të etnologjisë në Muze, Nora Prekazi, ka thënë se ky është edhe misioni i tyre, që t’i ofrojnë publikut të Mitrovicës ngjarje të tilla.
“Ka qenë një ditë me ndjenja të përziera, me streset e një organizimi të përmasave më të mëdha, për një artist të përmasave botërore e në anën tjetër me atë ngazëllimin që po e festojmë ditën ndërkombëtare të muzeve në kësi versioni të madh. Ka pasur streset e veta organizimi po edhe kënaqësitë e veta, e pamë dhe e dëgjuam vet se më çfarë duartrokitje u përmbyll. Kjo është edhe misioni i yni. T’i ofrojmë audiencës kënaqësi dhe mundësi për të bashkëjetuar me trashëgiminë, kështu që një mbrëmje e bukur”, tha Nora Prekazi.
Mbrëmja në Mitrovicë përfundoi me duartrokitje frenetike, për të vazhduar me koncertin në Prizren. Sipas Çekut, dy koncertet e realizuara brenda pak ditësh në Kosovë janë dhuratë e tij për publikun vendës.
“Koncerti im në Prizren, ashtu si edhe ai dy ditë më parë në Mitrovicë, ishin një dhuratë e imja për publikun tonë, që buron nga dëshira që këto "ushtrime muzikore", të cilat shpeshherë i luaj në vende të ndryshme të botës, t'i bëj edhe bashkë me publikun kosovar. Zgjidhja e këtyre qyteteve nuk ishte e rastësishme dhe është paksa vetë-shpjeguese. Realizimin e koncerteve e mundësuan Damfest, Autostrada Biennale dhe Komuna e Mitrovicës, të cilët vullnetarisht dhe pa rezervë ofruan punën, kohën dhe ekspertizën e tyre me qëllim që t'i shërbejnë të mirës së përgjithshme”.
Në këtë koncert i pranishëm ka qenë edhe ministri i Kulturës, Hajrulla Çeku, i cili ka vlerësuar se ka pasur shumë elemente që kanë krijuar atmosferë magjike në katedralen e “Zojës Ndihmëtare” në saje të interpretimit të veçantë të Petrit Cekut.
“Një ngjarje shumë e bukur, një vepër dhe një program jo i lehtë, që vështirë mund të gjendet edhe në skenat më të njohura botërore të muzikës klasike, e sonte vetëm për artdashësit e Kosovës respektivisht të Prizrenit. Një mbrëmje shumë e bukur me Petritin tonë, ishte edhe një moment i një jete të gjallëruar kulturore të Kosovës dhe i jemi mirënjohës gjithë artistëve tanë, në këtë rast Petritit, për punën që e bënë në gjithë botën, por që është pjesë edhe e aktiviteteve dhe e gjallërisë kulturore të shtetit tonë”, tha ministri Çeku.
Në Prizren për herë të fundit ishte paraqitur para publikut rreth 7 vjet më parë.
© KOHA. Të gjitha të drejtat janë të rezervuara.
