IKSHPK-ja vlerëson se 80 deri 90 për qind të mostrave janë me variantin Delta
1
Pëlqeje KTV Video për të parë video të përzgjedhura nga KOHA
Përfaqësuesit e Institutit Kombëtar të Shëndetësisë Publike kanë deklaruar se 80 deri në 90 për qind e mostrave që i kanë marrë së fundmi i takojnë variantit Delta. Në këtë vlerësim ka dalë IKSHPK-ja gjatë së shtunës, pasi pjesa më e madhe e mostrave të testuara kanë dalë negative për variantet Alfa, Beta e Gama
Shumica e mostrave që i ka testuar Instituti Kombëtar i Shëndetësisë Publike kanë dalë negative për variantin Alfa, Beta e Gama të koronavirusit. Por kjo, sipas drejtorit të Departamentit të Mikrobiologjisë të IKSHPK-së, Xhevat Jakupi, mund të jetë indikator se varianti Delta, më i rrezikshmi nga të katër variantet, është më i përhapuri.
“Diku 80 deri në 90 për qind të izolateve më të fundit të Sars koronavirusit 2 janë të variantit Delta. Edhe përderisa para 3-4 muajsh varianti Alfa ose ai britanik ishte në afër 98% të rasteve (izoluar), tash ky variant është në vetëm 7 deri në 8 për qind të izolanteve, kurse nuk gjejmë izolate të variantit Beta dhe Gama, ose atij të Afrikës së Jugut ose atij brazilian”, ka thënë Jakupi në një konferencë të përbashkët me ministrin e Shëndetësisë, Arben Vitia.
Vlerësimi i IKShPK-së erdhi pas dështimit të dërgimit të mostrave jashtë vendit, siç pohon Ministria e Shëndetësisë, për shkaqe logjistike. Institucionet tash për tash, sipas Jakupit, vazhdojnë të jenë në kërkim të një kompanie transportuese që i plotëson kushtet për transport mostrash.
“Ne kemi planifikuar që nga kjo e hënë të dërgojmë afër 100 mostra jashtë vendit përmes një projekti të përbashkët me Qendrën për Kontroll të Sëmundjeve të Evropës (ECDC-së), por fatkeqësisht kompania përgjegjëse për transport nga Kosova nuk po ka kapacitete dhe njohuri profesionale për ta kryer këtë proces të punës, kështu që tash jemi në diskutim për ta gjetur një kompani tjetër, e cila do t’i transportojë mostrat”, është shprehur Jakupi.
Ndërkohë, ministri i Shëndetësisë, Arben Vitia, ka theksuar rëndësinë e vaksinimit për parandalimin e vdekjeve nga koronavirusi.
“Edhe nëse sëmureni, tashmë është vërtetuar në bazë të shumë studimeve sesa e personave të pavaksinuar, e siç thashë edhe më herët, rastet fatale deri në 99 për qind janë ulur te personat e vaksinuar”, ka thënë Vitia.
Varianti Delta përhapet dy herë më shpejt sesa variantet e tjera të koronavirusit. Raste të infektimit me koronavirus janë raportuar edhe te personat e vaksinuar me të dyja dozat. Por, në 99 për qind të rasteve në SHBA, si pasojë e COVID-19 kanë vdekur persona të pavaksinuar.
Numri i personave që janë vaksinuar brenda 24 orëve, sipas Ministrisë së Shëndetësisë, është 12 mijë e 832.
Gjatë së premtes ka vdekur një person nga COVID-19, duke e çuar numrin e të viktimave të kësaj sëmundjeje gjatë këtij muaji në tetë, ndërsa 70 persona kanë rezultuar pozitivë nga 2941 të testuar.
