Në mungesë të Granit Xhakës, Xherdan Shaqiri do ta udhëheqë përfaqësuesen e Zvicrës në rolin e kapitenit, në ndeshjen e madhe ndaj Spanjës.

Zvicra e Spanja takohen të premten nga ora 18:00 në St. Petersburg të Rusisë. Është kjo ndeshja e parë çerekfinale e “Euro 2020”.

Shaqiri është prej lojtarëve kryesorë të Zvicrës dhe ndihet krenar që do të jetë kapiten. Por ai ka pranuar se nuk do të ndryshojë asgjë në përgatitje të ndeshjes.

Xhaka që luajti ndeshje të madhe ndaj Francës në një të tetën e finales mungon për shkak të kartonëve. Kështu që pritjet prej Shaqirit janë shumë të mëdha.

Ndaj Francës, Shaqiri ishte më i qetë, pasi vendosi ndeshjen e fundit në grup, përmes së cilës helvetikët kaluan në fazën nokaut.

“Do të përgatitem si për çdo ndeshje tjetër. Asnjëherë nuk ndryshoj rutinën, edhe nëse e mbaj shiritin e kapitenit. Jam shumë krenar ta udhëheq ekipin në ndeshje kaq të rëndësishme. Dua të shfaq aftësitë e mia në fushë dhe ta ndihmoj ekipin”, ka thënë Shaqiri të enjten për sajtin zyrtar të UEFA-s.

Ai ka paralajmëruar lojë sulmuese ndaj Spanjës.

“Ne kemi treguar se nuk qëndrojmë vetëm në mbrojtje. Si dëshmuam kundër Francës, mund të shënojmë më shumë se një gol. Duam të shfaqim stilin tonë të futbollit 100 për qind. Nëse mund të bëjmë këtë, atëherë çdo gjë është e mundur”, ka theksuar Shaqiri.

Ylli kosovar vlerëson se ka ndihmuar ekipin në aspektin defansiv në ndeshjen ndaj Francës. Me Francën, Zvicra fitoi me penallti. Kampionia e botës, Franca, ishte vlerësuar favorite për “Euro 2020”, ndërsa është eliminuar tashmë.

Shaqiri ka vlerësuar se është paraqitur mirë ndaj Francës.

“Në fund të fundit ne kemi fituar ndaj Francës. Ishte ndeshje e vështirë. Për mua nuk ishte lehtë, ndonëse kisha disa gjëra të mira. Kam ndihmuar shumë në aspektin defansiv dhe kjo ishte e rëndësishme për ekipin. Do të mundohem të jap çdo gjë për ekipin në ndeshjen ndaj Spanjës. Por nuk do të thotë se kam ndeshje të keqe nëse nuk shënoj apo nuk jap asistim”, vlerëson lojtari i Liverpoolit.

Zvicra për herë të parë ka arritur në çerekfinale të Evropianit. Në Botëror për herë të fundit në këtë fazë kishte arritur në vitin 1954.

Shaqiri është pyetur nëse ndihet me përgjegjësi më të madhe në mungesë të Xhakës.

“Unë vetëm mundohem të jem vetja. Do të mundohem ta ndihmoj ekipin me paraqitje të mirë. Ne jemi të fokusuar, e dimë çka duhet të bëjmë. Do të mundohemi të japim çdo gjë dhe vërtetë po shikojmë para për këtë”, ka thënë Shaqiri.

Sipas tij, ditët e fundit ishin emocionale për Zvicrën. Ka theksuar se fitorja ndaj Francës ishte historike.

“Ne ishim vërtetë të lumtur për atë, por tani kemi një ndeshje tjetër të vështirë. Duhet të shkojmë përtej limiteve edhe njëherë”.