Policia në Brazil njoftoi se i ka anuluar pasaportat e Flavio Bolsonaros, që ishte kandidat për president, pasi ai nuk e zbatoi urdhrin për dorëzimin e dokumenteve, raporton “BBC”.
Të hënën, Gjykata Supreme urdhëroi Bolsonaron që t’ia dorëzonte pasaportat policisë brenda 24 orëve, në kuadër të një hetimi për pastrim të dyshuar parash, akuzë të cilën ai e mohon.
Në atë kohë, Bolsonaro tha se nuk kishte plane të largohej nga vendi dhe këmbënguli se do të qëndronte në Brazil për të udhëhequr opozitën ndaj rivalit të tij të majtë, presidentit Luiz Inacio Lula da Silva.
Megjithatë, afati përfundoi dhe senatori nuk i dorëzoi pasaportat, duke nxitur spekulime se ai mund të jetë larguar nga vendi.
Oficerët federalë po kontrollojnë pikat kufitare për të përcaktuar nëse Bolsonaro mund të ketë udhëtuar drejt Argjentinës fqinje, sipas një burimi policor të kontaktuar nga BBC News Brasil.
Megjithatë, autoritetet argjentinase i kanë thënë BBC-së se nuk ka të dhëna që Bolsonaro të ketë hyrë në vend përmes ndonjërës prej pikave kufitare.
Bolsonaro është nën hetim për korrupsion të dyshuar lidhur me financimin e një filmi për të atin, ish-presidentin Jair Bolsonaro, i cili u dënua për komplot për grusht shtet dhe ndodhet në arrest shtëpiak.
Përveç këtij hetimi, Gjykata Supreme e Brazilit urdhëroi të martën policinë ta hetojë fushatën zgjedhore të Flavio Bolsonaros, për financim të dyshuar nga jashtë vendit.
Senatori 45-vjeçar pësoi një humbje të rëndë të dielën, kur u mposht nga Lula në balotazhin presidencial, të cilin Bolsonaro pritej gjerësisht ta fitonte.
Sondazhet e opinionit e nxirrnin atë paksa përpara Lulës, ndërsa analistët theksonin se fitorja e Bolsonaros në raundin e parë të zgjedhjeve, më 4 tetor, nënkuptonte se ai kishte gjasa ta fitonte edhe balotazhin.
Megjithatë, pas një epërsie fillestare gjatë numërimit të votave, ai u parakalua nga presidenti aktual, i cili u bë kandidati i parë presidencial që përmbysi humbjen në raundin e parë për të fituar në raundin e dytë.
Lula fitoi 51,79 për qind të votave, krahasuar me 48,21 për qind të Bolsonaros.
Pavarësisht se mbeti prapa me 4,4 milionë vota, Bolsonaro nuk e ka pranuar humbjen dhe ka kërkuar anulimin e zgjedhjeve.
Ai pretendon se është vënë në pozitë të pafavorshme, sepse votimi u zgjat për dy orë ditën e zgjedhjeve, ndonëse zgjatjen e kishin kërkuar si partia e tij, ashtu edhe ajo e rivalit.
Ai e cilësoi zgjatjen e votimit, të urdhëruar nga një gjyqtar i Gjykatës Supreme, si një “hile të pistë”.
Megjithatë, partia që ai përfaqësonte, Partia Liberale, e ka pranuar rezultatin, ndonëse ka deklaruar se zgjatja e orarit të votimit “meriton të hetohet”.