Vukashinovic, kidnapped in Kosovo, has been held "hostage" in Serbia for a year

Më 1 nëntor të vitit të kaluar, shtetasi i Kosovës Milan Vukashinoviq u plagos me armë zjarri dhe u rrëmbye në fshatin Jellakçë të Leposaviqit. Ai vazhdon të mbahet në Serbi, i palëvizshëm dhe me një plumb në shtyllën kurrizore. Miku i familjes së Vukashinoviqit, ish-zëvendësministri Radoica Radomiroviq, e ka akuzuar Serbinë për pengim të trajtimit të nevojshëm mjekësor

Një vit pas plagosjes dhe rrëmbimit në territorin e Kosovës, Milan Vukashinoviqi vazhdon të mbahet në Serbi.

Shtetasi i Kosovës, i cili u qëllua me armë zjarri nga persona të panjohur në fshatin Jellakçë dhe më pas u dërgua me forcë në Serbi, ka mbetur i palëvizshëm, me një plumb në shtyllën kurrizore.

Miku i familjes së Vukashinoviqit, ish-zëvendësministri Radoica Radomiroviq, ka thënë se pavarësisht rekomandimit të mjekëve, atij nuk i është mundësuar trajtimi i nevojshëm mjekësor.

“Nuk kemi informacione të sakta për gjendjen e tij shëndetësore, përveç faktit se ai vazhdon të jetë i palëvizshëm dhe se ka një plumb në shtyllën kurrizore. Megjithatë, policia asnjëherë nuk ka marrë apo nuk i është dorëzuar ndonjë raport mjekësor për gjendjen e tij shëndetësore”, ka thënë Radomiroviq.

Radomiroviq ka thënë se Vukashinoviq kishte hyrë në grevë urie, për të ushtruar presion ndaj gjykatës që t’i mundësohej trajtimi mjekësor.

“Megjithatë, Milan Vukashinoviqi ishte transferuar në njësinë e paraburgimit në Grabovc. Atje nuk i ishte ofruar mbrojtja e nevojshme shëndetësore, përkatësisht trajtimi mjekësor, me arsyetimin se reparti i fiziatrisë në Grabovc ishte në renovim”, ka thënë ai.

Ai thotë se kjo është bërë më urdhër të Milan Radoiçiqit dhe strukturave në Serbi.

“Me rekomandim të mjekëve, është dashur t’i nënshtrohet një operacioni në shtyllën kurrizore. Por, siç kemi parë deri më tani, gjyqtarët që po e trajtojnë rastin e Milan Vukashinoviqit, Nebojsha Millosheviq dhe Gordana Gjuriq, në çdo mënyrë po tentojnë ta pengojnë trajtimin e tij mjekësor. Ne besojmë se kjo po bëhet me urdhër të Radojiçiqit dhe strukturave kriminale në Serbi. Nuk ka dyshim se pas krimit të kryer ndaj Milan Vukashinoviqit qëndron shteti i Serbisë, përkatësisht strukturat e tij kriminale”, është shprehur Radomiroviq.

Radomiroviq thotë se pas ndryshimit të pushtetit në Serbi, pritjet janë që institucionet të reagojnë lidhur me gjendjen shëndetësore të Vukashinoviqit.

Sipas autoriteteve të Kosovës, Vukashinoviqi u plagos dhe më pas u rrëmbye në fshatin Jellakçë, afër Leposaviqit më 1 nëntor të 2025-tës, para se të dërgohej në spitalin e Prokuples, e më pas në Qendrën Klinike të Nishit. Sipas këtyre institucioneve, motivi i rrëmbimit dhe tentimvrasjes së tij lidhet me faktin që ai nuk i bindej Listës Serbe dhe urdhrave të Serbisë për ta lënë punën në Byronë Kosovare të Sigurimeve.