Botë

Numri dy i NATO-s e quan blof kërcënimin e Putinit

Descriptive Text

Zëvendëssekretari i Përgjithshëm i NATO-s, Mircea Geoana, ka thënë se kërcënimi për “luftë bërthamore” i presidentit rus Vladimir Putin për momentin është vetëm “frikësim psikologjik”, shkruan “Politico”.

Putini ka dhënë paralajmërimin për “luftë bërthamore” të enjten, pasi presidenti francez Emmanuel Macron i ka qëndruar stoik mesazhit se Perëndimi nuk duhet të përjashtojë mundësinë e dërgimit të trupave në Ukrainë.

“Kjo me të vërtetë është kërcënim për konflikt me armë bërthamore”, ka thënë Putini para Asamblesë Federale ruse.

Por zyrtari i NATO-s ka karakterizuar paralajmërimin e Putinit si “diskurs që synon frikësim psikologjik e jo qëllime të vërteta”, në një intervistë me gazetën spanjolle “El País”.

“Ne nuk shohim ndonjë kërcënim të menjëhershëm nga Rusia rreth përdorimit të këtyre armëve. Por këto deklarata në vete janë shumë të rrezikshme, sepse prishin besimin. Rusia i di pasojat e ndërmarrjes së këtij hapi”, ka shtuar ai.

Geoana gjithashtu ka thënë se NATO-ja “duhet të vazhdojë mbështetjen e Ukrainës dhe të shmangë përshkallëzimet me Rusinë”.

Për propozimin e Macronit, ai ka thënë se NATO-ja i respekton idetë e aleatëve, por nuk synon ose planifikon dërgimin e trupave në Ukrainë.

Geoana shpreson se aleanca do të mbetet e fortë edhe nëse ish-presidenti Donald Trump i fiton zgjedhjet presidenciale të Shteteve të Bashkuara të Amerikës këtë nëntor.

“Edhe republikanët edhe demokratët e kuptojnë konkurrencën me Kinën, Rusinë, Iranin dhe Korenë e Veriut. SHBA-së do i duhen aleatët e saj në Evropë dhe në pjesën tjetër të botës”, ka thënë Geoana.