Katër persona kanë mbetur të vdekur dhe dhjetëra të tjerë janë lënduar, pasi një tren pasagjerësh doli nga shinat në Indinë lindore.
Të 21 vagonët e trenit North-East Express, i cili ishte nisur nga Nju Delhi për në Assam, dolën nga shinat pranë stacionit hekurudhor Raghunathpur.
Dy prej vagonëve u përmbysën. Shkaku i aksidentit është duke u hetuar.
Sipas raporteve të para, 70 pasagjerë janë lënduar, 31 prej të cilëve janë shtruar në spital.
Në qershor, India u përball me një nga aksidentet hekurudhore më vdekjeprurëse të vendit, ku dy trena pasagjerësh u përplasën mes vete, duke lënë të vdekur më shumë se 280 persona dhe rreth 900 të lënduar.
Shumica e aksidenteve hekurudhore në Indi ndodhin si shkak i pajisjeve të vjetërsuara të sinjalizimit.
14 mijë trena bartin çdo ditë mbi 12 milionë njerëz në të gjithë Indinë, në gjithsej 64 mijë kilometra rrugë. / AP
