Kreu i grupit mercenar Wagner, Yevgeny Prigozhin, ka thënë se do të vazhdojnë të luftojnë në vendet afrikane ku tashmë janë të pranishëm.
Që kur Prigozhin ngriti një kryengritje të dështuar në Rusi muajin e kaluar dhe u dëbua në Bjellorusi, ka pasur pikëpyetje mbi të ardhmen e Wagnerit.
“Nuk ka pasur dhe nuk do të ketë reduktim në programet tona në Afrikë”, ka theksuar Prigozhini për Afrique Média TV.
BBC Verify ka analizuar audion dhe ka konfirmuar se është zëri i Prigozhinit.
Ai nuk u shfaq në kamerë gjatë intervistës me Afrique Médian, i cili është një kanal lajmesh pro-Kremlinit që synon vendet afrikane frankofone dhe ka qenë i lidhur me grupin Wagner.
Ushtarët e Prigozhinit janë të pozicionuar në vende, duke përfshirë Malin dhe Republikën e Afrikës Qendrore (CAR) - ku grupet e të drejtave të njeriut dhe OKB-ja i akuzojnë për kryerjen e krimeve të luftës.
Luftëtarët e Wagnerit akuzohen gjithashtu nga SHBA-ja për pasurimin e tyre me marrëveshje të paligjshme ari në kontinent.
Por Prigozhini ka këmbëngulur se puna e tyre është e një natyre tjetër.
“Ne vazhdojmë të punojmë në të gjitha vendet ku filluam ose po bëjmë tani këtë punë bashkëpunimi dhe zhvillimi”, ka thënë ai për Afrique Média TV. “Nëse ndihma e Grupit Wagner nevojitet kudo për të luftuar bandat dhe terroristët dhe për të mbrojtur interesat e njerëzve të këtyre vendeve, ne jemi të gatshëm të fillojmë menjëherë ta përmbushim këtë detyrë pasi të biem dakord për kushtet”.
Komentet e shefit të Wagnerit bëjnë jehonë krahas atyre të ministrit të Jashtëm rus, i cili ka thënë se pavarësisht ngjarjeve të fundit, Wagner dhe Rusia ishin në Afrikë për të qëndruar.
