Njëmbëdhjetë punëtorë kanë vdekur në mëngjesin e së mërkurës pasi muri i një kompleksi të madh u shemb si pasojë e dobësimit nga shirat.
Fatkeqësia ka ndodhur në periferi të kryeqytetit të Pakistanit, Islamabad.
Muri u shemb teksa punëtorët po qëndronin brenda tendave buzë rrugës në kantierin e ndërtimit.
Kryeministri Shehbaz Sharif në një deklaratë shprehu dhimbjen dhe pikëllimin e tij për vdekjet. Bëhet e ditur se edhe pesë punëtorë të tjerë janë lënduar.
Shirat e kanë goditur Pakistanin që nga 25 qershori, duke lënë të vdekur 112 njerëz në incidente të lidhura me motin. Shirat kanë shkaktuar edhe daljen e lumenjve nga shtrati në provincën lindore Punjab, me ç ‘rast janë përmbytur qindra fshatra e të paktën 15 mijë njerëz janë zhvendosur nga shtëpitë e tyre.
