Të paktën pesë persona kanë mbetur të vdekur dhe 48 të tjerë janë zhdukur pasi një minierë e hapur qymyri është shembur në Mongolinë e Brendshme, rajon autonom në Kinën veriore, raportoi të enjten “The Guardian”.
Një nga muret e minierës është rrëzuar rreth orës 13:00 me orën lokale të mërkurën, duke varrosur punëtorët në tonelata shkëmbinjsh dhe rërë. Një tjetër shembje ndodhi pesë orë më vonë, duke detyruar operacionin e shpëtimit të ndalonte.
Kërkimet rifilluan mëngjesin e së enjtes, me zjarrfikës, buldozerë dhe qenë shpëtimi të mobilizuar nga e gjithë krahina.
Presidenti Xi Jinping bëri thirrje për përpjekje të gjithanshme në kërkim dhe shpëtim dhe ruajtjen e stabilitetit social.
Një hetim për shkakun e katastrofës ishte duke u zhvilluar.
Miniera operohet nga Inner Mongolia Xinjing Coal Industry. Vitin e kaluar kompania u gjobit për disa shkelje të sigurisë, duke përfshirë rrugët e pasigurta brenda dhe jashtë minierës dhe ruajtjen e pasigurt të materialeve të paqëndrueshme. Në qershor 2022, dy punëtorë u zbuluan se punonin në minierë pa certifikimin e duhur.
Kompania ka qenë gjithashtu e përfshirë në qindra procese gjyqësore në lidhje me borxhet e papaguara midis viteve 2014 dhe 2022, sipas mediave shtetërore.
Mongolia e Brendshme është një nga tre rajonet kryesore të Kinës për prodhimin e qymyrit. Së bashku me Shanxi dhe Shaanxi, ajo prodhon 90% të qymyrit të vendit. Në vitet e fundit qeveria ka nxitur për më shumë prodhim nga industria në një përpjekje për të grumbulluar rezerva karburanti. Vitin e kaluar Kina prodhoi një rekord prej 4.5 miliardë tonësh qymyr, një rritje prej 9% në vitin 2021.
