Autoritetet e Zelandës së Re kanë gjetur një sasi rekord kokaine në ujërat ndërkombëtare, e cila sipas tyre ishte e destinuar për në Australi dhe do të kishte mjaftuar për të furnizuar vendin për një vit, shkruan The Guardian.
Transporti prej 3.2 tonësh u vlerësua në 500 milion dollarë. Ishte konfiskimi më i madh i drogave të paligjshme të bëra nga forcat e zbatimit të ligjit të Zelandës së Re, ka thënë komisioneri i policisë, Andrew Coster, në një konferencë shtypi në Wellington të mërkurën.
Operacioni i përbashkët ndërmjet policisë së Zelandës së Re, mbrojtjes dhe agjentëve doganorë çoi në zbulimin e kokainës në Oqeanin Paqësor, ku 81 balona droge po lundronin në rrjeta në ujërat ndërkombëtare për gjashtë ditë në veri-lindje të Zelandës së Re.
Sasia e drogës ishte e mjaftueshme për të furnizuar Zelandën e Re për 30 vjet, gjë që e bëri të qartë se “nuk kishte asnjë mënyrë që të ishte e destinuar për atë vend”, ka thënë policia.
“Zelanda e Re nuk është një treg kokaine. Ne jemi të vegjël në krahasim me Australinë”, kanë thënë autoritetetet.
Kokaina u gjet në fillim të këtij muaji dhe mbërriti të martën me anije nën shoqërimin e policisë në Auckland, ku do të asgjësohet.
Asnjë arrestim nuk është bërë në lidhje me rastin.
Coster ka thënë se strategjia e trafikantëve të drogës – për të lënë drogën e paketuar në ujërat ndërkombëtare që më pas ta marrin nga anije të tjera – ishte përdorur gjerësisht.
© KOHA. Të gjitha të drejtat janë të rezervuara.
