Qeveria e Hong Kongut i ka bërë të ditura planet për të dhënë 500 mijë bileta aeroplani falas, si pjesë të përpjekjeve për ta rimëkëmbur industrinë e turizmit dhe për t’i tërhequr vizitorët në qytet.
Iniciativa “Hello Hong Kong” është bërë e ditur të enjten, ndonëse për të është nisur të punohet dy vjet më parë, raportoi CNN-i të premten.
Biletat do të shpërndahen nëpër tri kompani të fluturimit në qytet, Cathay Pacific, HK Express dhe Hong Kong Airlines. 500 mijë biletat do t’i kushtojnë qytetit 254,8 milionë dollarë në total.
Biletat do të alokohen në tri valë: nga 1 marsi për njerëzit rreth Azisë Jugore, nga 1 prilli për njerëzit në Kinë dhe nga 1 maji për banorët e të gjithë botës.
Hong Kongu ishte i ngadaltë dhe i kujdesshëm në qasjen e tij ndaj pandemisë së koronavirusit.
Qyteti filloi të anulojë ngjarjet personale në janar tw vitit 2020 kur rastet e para të pacientëve që shfaqnin simptoma të një sëmundjeje të re të ngjashme me gripin u raportuan në Wuhan, Kinë.
Udhëtimi brenda dhe jashtë Hong Kongut ishte sfidues dhe i shtrenjtë gjatë pandemisë. Karantinat e rrepta, të cilat arritën kulmin në 21 ditë izolim, dhe kërkesat për teste të shumta PCR mbajtën jashtë shumicën e udhëtarëve.
© KOHA. Të gjitha të drejtat janë të rezervuara.
