Gjykata Supreme urdhëron shkarkimin e një ministri në Izrael
Gjykata Supreme në Izrael ka urdhëruar kryeministrin Benjamin Netanyahu që të shkarkojë njërin nga ministrat e tij, duke shkaktuar krizë në koalicionin e tij dhe duke thelluar përplasjen në lidhje me fuqinë e gjykatave.
Gjykata e Lartë ka marrë vendim se Aryeh Deri, kryetar i partisë ultra-ortodokse që ka shërbyer në qeveritë e mëparshme të Netanyahut, është i pakualifikuar për të shërbyer si ministër pasi ishte dënuar gjatë vitit të kaluar për shmangie të tatimeve dhe ishte në provë si pjesë e marrëveshjes për pranim të fajit.
Deri ka premtuar se nuk do të ofrojë dorëheqjen. Lideri opozitar, Yair Lapid, ka thënë se nëse Deri nuk shkarkohet, Izraeli do të hyjë në krizë të paparë kushtetuese dhe se nuk do të jetë më demokraci.
Vendimi i gjykatës është marrë në kohën kur Izraeli është përfshirë në krizë politike në lidhje me ndryshimet në sistemin gjyqësor të shtetit.
Një prej ndryshimeve është edhe heqja e testit të arsyeshmërisë në rishikimin e vendimeve të qeverisë. Qeveria e Netanyahut ka në plan kryesor dobësimin e Gjykatës Supreme.
