Botë

Kreu i Wagnerit: Luftëtarët tanë mund të mësojnë nga ushtria e Ukrainës

Kreu i forcave mercenare ruse Wagner, Yevgeny Prigozhin, tha të enjten se grupi i tij mund të marrë mësim nga ushtria ukrainase, përderisa beteja po vazhdon për qytetin e rëndësishëm në lindje të Ukrainës, Bahmut.

“Ushtria ukrainase po punon me qartësi dhe harmoni. Mund të mësojmë shumë nga ta”, tha Prigozhin në një deklaratë të publikuar nga shërbimi i tij për media.

Por, ai insistoi se “vendbanimi i Artemovskit do të rimerret”, në një deklaratë ku përdori emrin rus të qytetit Bahmut.

Për disa muaj, forcat e armatosura të Rusisë dhe luftëtarët mercenarë të Wagnerit kanë tentuar ta marrin këtë qytet në rajonin lindor të Donetskut në Ukrainë.

Moska ka synim ta ketë nën kontrollin të gjithë rajonin e Donetskut.

Javën e kaluar, Prigozhin dhe ushtria ruse bënë deklarata të kundërta për marrjen e Soledarit, një qytezë ku ndodhet një minierë kripe dhe që gjendet afër Bahmutit. Kjo kishte nxitur dyshime për një përçarje, gjë që më vonë u mohua nga Kremlini.

Ministria ruse e Mbrojtjes e kishte deklaruar “çlirimin” e Soledarit të premten. Kjo ishte ndjekur nga një deklaratë ku lavdëroheshin forcat “guximtare” të Wagnerit, në një mirënjohje të pazakontë për kontributin e dhënë nga grupi privat luftarak.

Të enjten, Prigozhin tha se njësitë e tij kishin avancuar më afër Bahmutit, duke marrë nën kontroll fshatin Klishchiivka.

“Mund të themi me siguri se vendbanimi Klishchiivka, që është njëra ndër rrethinat më të rëndësishme të Bahmutit, është marrë plotësisht nën kontroll nga njësitë PMC të Wagnerit”, tha Prigozhin.

Agjencia e lajmeve AFP nuk ka arritur t’i verifikojë këto pretendime.

Grupi mercenar, i themeluar në vitin 2014 – që ka qenë i përfshirë në konflikte në Afrikë, Amerikë Latine dhe Lindje të Mesme – u bë i njohur pasi presidenti Vladimir Putin i dërgoi trupat ruse në Ukrainë më 24 shkurt 2022.

Prigozhin e ka kritikuar ushtrinë e rregullt të Rusisë në Ukrainë pas një mori zmbrapsjesh gjatë muajve të fundit dhe ka sugjeruar se grupit të tij ushtarak nuk i është dhënë merita adekuate. /REL