Një person ka vdekur pas një shpërthimi në një ndërtesë në ishullin Jersey, që ndodhet ndërmjet Francës dhe Anglisë.
Rreth 12 persona janë zhdukur dhe dy janë duke u trajtuar në spital pas shpërthimit në Pier Road në St Helier pak para orës 04:00 sipas kohës lokale.
Kërkimet janë duke u zhvilluar dhe shefi i policisë, Robin Smith tha se priste që kjo të zgjaste "disa ditë".
"Është një skenë mjaft shkatërruese. Skena është shumë e rrezikshme për të gjithë stafin tonë," tha ai.
Ai ka shtuar se nuk e di numrin e saktë të banesave të shkatërruara, por ka shtuar se një ndërtesë trekatëshe është shembur plotësisht.
Shërbimet e urgjencës thanë se zjarri i shkaktuar nga shpërthimi është shuar. Forca tha se po përdorte burime të specializuara për të gjetur "këdo të bllokuar në rrënoja".
Qeveria e Jersey u ka kërkuar banorëve të ishullit që të mos shkojnë në Departamentin e Emergjencave "nëse nuk është shumë e nevojshme".
Një banore përshkroi se u zgjua nga ajo që mendonte se ishte një tërmet rreth orës 03:50.
"Shtrati filloi të dridhej dhe pati një zhurmë të madhe," tha ajo.
