Botë

Inflacioni në Evropë po bie për herë të parë në 17 muaj

Për herë të parë në 17 muaj, inflacioni në Evropë po zbutet.

Çmimet e konsumit u rritën me 10 për qind këtë vit deri në nëntor, sipas të dhënave zyrtare për 19 vendet që përdorin euron. Kjo është shifra më e ulët nga një rritje rekord prej 10.6 për qind muajin e kaluar dhe është më e ulët se sa prisnin ekonomistët.

Në Gjermani, që llogaritet të jetë ekonomia më e madhe e bllokut, inflacioni vjetor ra në 11.3 për qind nga 11.6 për qind. Inflacioni në Itali u ul në 12.5 për qind ​​nga 12.6 për qind, ndërsa Spanja pa një rënie më të madhe, në 6.6 për qind nga 7.3 për qind, raportoi CNN të mërkurën.

Çmimet megjithatë janë ende duke u rritur, të nxitura nga rritja e kostos së energjisë dhe ushqimit.

Ndërsa inflacioni i çmimit të energjisë ra në afërsisht 35 për qind nga viti në vit, krahasuar me gati 42 për qind në tetor, çmimet për ushqimet, alkoolin dhe duhanin vazhduan të rriten ndjeshëm.

Çmimet e naftës kanë rënë ndjeshëm që nga vera pasi frika e recesionit dhe bllokimet e koronavirusit në Kinë ndryshuan perspektivën për kërkesën. Çmimet e gazit natyror në Evropë kanë rënë gjithashtu nga nivelet më të larta të të gjitha kohërave, pas një fushate të suksesshme për të mbushur objektet e magazinimit dhe për shkak të motit relativisht të butë.

Inflacioni dyshifror mbetet një problem i madh për politikëbërësit, të cilët kanë treguar se do të vazhdojnë përpara me përpjekjet për të vënë çmimet nën kontroll.