Lideri çeçen, Ramzan Kadyrov, po i vazhdon thirrjet për luftë në Ukrainë, duke deklaruar se në tokat ukrainase “duhet të zhvillohet xhihad”.

Nëpërmjet një videomesazhi, Kadyrov tha të martën mbrëma se Ukraina është territor rus, me ç'rast, sipas tij, “vullnetarët do të shkojnë deri në fund”, transmetoi TheMoscowTimes” të mërkurën.

“Ju jap fjalën time: ne do t'i sulmojmë ata çdo ditë. Ne nuk do t'i marrim robër këta shejtanë. Do t'i djegim. Ne nuk do të ndalemi askund. Jam thellësisht i pakënaqur me situatën e sotme (ofensivën ukrainase), por njerëzit që komandojnë në krye kuptojnë më shumë se unë. Ky është një xhihad i madh në të cilin të gjithë duhet të marrin pjesë”, deklaroi Kadyrov.

Javë më parë, Kadyrov deklaroi se e ka nisur një prej djemve të tij në frontet e luftës krah trupave ruse. Në fillim të agresionit rus (24 shkurt), lideri çeçen ka thënë se po të ishte e nevojshme, do të inkuadrohej edhe vetë në luftime.

Situata në terren vlerësohet ndryshe. Instituti Amerikan për Studimin e Luftës ka bërë me dije se ofensiva ukrainase ka shënuar progres të madh në disa rajone. Ushtria ruse në anën tjetër, sipas Institutit, është detyruar vetëm të mbrohet, pa hapësirë për t’i shpërndarë luftimet.

Xhihadi, në pikëpamjen e fesë Islame, ndërlidhet me luftimin e pabesimtarëve.