Vendet baltike do të refuzojnë strehimin e rusëve që ikin nga mobilizimi
Foto ilustrim / BBC
Vendet baltike kanë njoftuar se do të refuzojnë t’i strehojnë rusët që ikin nga mobilizimi i paralajmëruar të mërkurën, shkroi Reuters.
Ministrat e Jashtëm të Letonisë, Lituanisë dhe Estonisë, vende të cilat kufizohen me Rusinë, kanë njoftuar se nuk do të ofrojnë strehim për asnjë rus që ikën nga mobilizimi i trupave të Moskës.
“Refuzimi për të përmbushur detyrën e tyre qytetare në Rusi, nuk përbën bazë të mjaftueshme për t’iu dhënë azil në një vend tjetër”, ka thënë kryediplomati estonez, Urmas Reinsalu.
Gjatë ditës së mërkurë është raportuar se si rusët po nxitojnë të largohen nga Rusia, duke ikur në ato vende që nuk i kanë vënë sanksione Moskës për agresionin në Ukrainë. Po ashtu, urdhri për mobilizim ka nxitur protesta në gjithë Rusinë, me ç’rast janë arrestuar gati 1000 veta.
Putini urdhëroi mobilizimin e menjëhershëm të 300,000 rezervistëve.
