Talebanët njoftuan se kanë arrestuan dhe do ta dënojnë shpejt një grua afgane që u shfaq në një video në rrjete sociale këtë javë dhe tha se një zyrtar i lartë taleban e detyroi atë në martesë dhe e përdhunoi vazhdimisht.

Në video, gruaja qante derisa përshkruante se rrahje dhe përdhunohej nga ish-zëdhënësi i Ministrisë së Brendshme talebane, Saeed Khosti. Ajo tha se po fliste nga një apartament në Kabul ku talebanët e kishin mbyllur pasi tentoi të ikte nga vendi, dhe kërkoi shpëtim, raportoi AP.

“Këto mund të jenë fjalët e mia të fundit. Ai do të më vrasë, por është më mirë të vdes një herë sesa të vdes çdo ditë”, tha ajo.

Të mërkurën, një ditë pasi u publikua videoja, Gjykata Supreme tha se gruaja u arrestua për shpifje. Pa përmendur gjyq, gjykata tha se ajo “shpejt do të dënohet sipas sheriatit”.

“Askush nuk lejohet ta dëmtojë emrin e muxhahidinëve ose të shpifë për Emiratin Islamik të Afganistanit dhe 20 vjetët e xhihadit të shenjtë”, tha gjykata.

Prej marrjes së pushtetit nga talebanët në gusht 2021, aktivistet afgane kanë raportuar rritje të numrit të martesave me forcë të grave.

Gruaja në video tha se Khosti e kishte detyruar në martesë gjashtë muaj më parë, kur ai ishte ende në pozitë dhe se kishte tentuar ta martonte edhe motrën e saj me një tjetër zyrtar taleban, por familja e saj kishte ikur me sukses nga vendi.

“Saeed Khosti më ka rrahur shumë. Çdo natë më ka përdhunuar”, tha ajo në lot.

Ajo tregoi se tentoi të ikte në Pakistan, por talebanët e kapën në kufi dhe e kthyen në Kabul.