Rusia ka njoftuar se nuk pret që Gazpromi të ndalojë furnizimet me gaz për ndonjë vend tjetër evropian, shkruan BBC të enjten.
Kompania ruse e energjisë tashmë ka ndaluar furnizimet në disa vende, duke përfshirë Poloninë dhe Finlandën, pasi ato refuzuan të bënin pagesa në monedhën ruse, rubla.
Por Kremlini thotë se skema e rublave - e krijuar në përgjigje të sanksioneve perëndimore - po funksionon siç synohet.
Sipas Kremlinit, nuk është arritur asnjë marrëveshje me Turqinë për eksportimin e dërgesave të grurit ukrainas përmes Detit të Zi.
Turqia ka bërë përpjekje për një marrëveshje midis Rusisë dhe Ukrainës mbi një plan për të rifilluar eksportet e grurit nga portet ukrainase.
Zëdhënësi i presidentit Putin, Dmitry Peskov, ka thënë se puna po vazhdon për një marrëveshje.
