Ferdinand Marcos Jr, djali i ish-diktatorit të Filipineve, është në prag të fitimit të zgjedhjeve presidenciale të Filipineve me rezultate paraprake dhe jozyrtare, duke e çuar dinastinë Marcos një hap më afër Pallatit Malacañang, 36 vjet pasi familja iku nga një kryengritje masive.
Marcos Jr ka rreth 30 milionë vota në krahasim me rivalin e tij më të afërt, nënpresidentin në largim Leni Robredo, i cili ka rreth 14 milionë vota, sipas një numërimi të pjesshëm dhe jozyrtar të Komisionit për Zgjedhjet, raporton CNN të martën.
Rezultatet zyrtare, megjithatë, mund të duhen javë për t'u konfirmuar.
I njohur si "Bongbong" në Filipine, ngritja e Marcos Jr është kulmi i një përpjekjeje prej dekadash për të riemërtuar emrin dhe imazhin e familjes Marcos, së fundmi përmes mediave sociale, thonë analistët.
Marcos Jr është djali i ish-udhëheqësit autoritar Ferdinand Marcos Sr, sundimi 21-vjeçar i të cilit u shënua nga abuzime të të drejtave të njeriut dhe grabitje të arkës së shtetit.
Gjatë fushatës, Marcos Jr kandidoi në një platformë "uniteti" dhe ka premtuar më shumë vende pune, çmime më të ulëta dhe më shumë investime në bujqësi dhe infrastrukturë.
Ndërkohë, në garë për zëvendëspresidente është Sara Duterte Carpio, vajza e liderit populist në largim Rodrigo Duterte.
Rezultatet e pjesshme dhe jozyrtare tregojnë se Duterte Carpio po kryeson garën për zv.president.
Zëvendëspresidenti zgjidhet veçmas nga presidenti në Filipine.
© KOHA. Të gjitha të drejtat janë të rezervuara.
