Kremlini ka hedhur poshtë të martën pretendimet se është duke planifikuar sulm kibernetik, si hakmarrje ndaj një vale sanksionesh të vendosura nga shtetet e Perëndimit.
Zëdhënësi i presidentit rus, Vladimir Putin, Dmitry Peskov, u ka thënë gazetarëve se Rusia nuk angazhohet në banditizëm në nivel shtetëror, raportoi Sky News.
“Ndryshe nga shumë vende perëndimore, përfshirë Shtetet e Bashkuara, Rusia nuk angazhohet në banditizëm në nivel shtetëror", tha Peskov.
Këto komente vijnë një ditë pasi Shtëpia e Bardhë paralajmëroi, bazuar në analizat e Inteligjencës së saj, se qeveria ruse është duke hulumtuar opsione për një sulm kibernetik.
Presidenti amerikan, Joe Biden, ka thënë të hënën se beson se Rusia është duke u përgatitur për operacione të "flamurit të rremë" – akt i kryer me qëllimin për të fajësuar një palë tjetër.
Bideni po ashtu ka deklaruar se Putini mund të jetë duke u bërë gati që të përdorë armë kimike apo biologjike në Ukrainë.
