Botë

Eksperti shqiptar i financave paralajmëron falimentimin e Rusisë në mesnatë

Rusia rrezikon të falimentojë në mesnatën e ditë së sotme për shkak të pamundësisë së pagesës ndaj investitorëve të huaj.

Borxhi total i bonove ndaj kompanive investuese është 150 miliardë dollarë, ka bërë të ditur njohësi i tregjeve financiare, Emanuel Bajra.

“Nesër banka qendrore e Rusisë duhet t’i paguajë investitorët e vetë plot 150 miliardë dollarë. Kjo do të jetë e pamundur pasi që tashmë Rusia nuk ka para. Falimentimi i parë i Rusisë si pasojë e pa aftësisë së kthimit të borxhit investitorëve që nga revolucioni i vitit 1917 pritet nesër”, shkroi ai në Facebook të martën.

Bajra, ish-bankier në Londër, i tha KOHËS se Rusia ka afat deri në mesnatë t’ua kthejë investitorëve të jashtëm bonot e thesarit të maturuara, e nëse nuk kryhet ky obligim, sipas tij, Rusia do të pësojë krizë tjetër të konfidencës.

“Rusët kanë paralajmëruar se do t’i paguajnë bono-mbajtësit (investitorët) me rubla (monedhë ruse), por investitorët nuk do të pranojnë, sepse kombinimi i sanksioneve në SWIFT dhe transferet e kapitalit, e pamundësojnë konvertimin e këtij kapitali në dollarë”, tha Bajra për KOHËN.

Shumë prej bankave të Rusisë janë përjashtuar nga sistemi SWIFT, pas agresionit të Rusisë mbi Ukrainën.

SWIFT, ose “Shoqëria për Telekomunikacionin Financiar Ndërbankar në Botë”, është një sistem komunikimi, që lehtëson pagesat e shpejta ndërkufitare, duke bërë që tregtia ndërkombëtare të zhvillohet më lehtë. Bankat që lidhen me sistemin SWIFT dhe krijojnë marrëdhënie me banka të tjera, mund të përdorin kodet SWIFT për të kryer pagesat.