1 perditesime
16:36

Së paku 46 të vdekur në Tajvan, shkaqet e zjarrit nuk dihen

Së paku 46 persona kanë mbetur të vdekur nga zjarri i fuqishëm që kaploi një ndërtesë në jug të Tajvanit.

Ndërtesa 13-katëshe u përfshi nga flakët në orët e hershme të mëngjesit, ndërkaq zjarrfikësit tajvanezë kanë thënë se zjarri brenda pak sekondash ka kapluar të gjithë ndërtesën.

Autoritetet kanë bërë të ditur se 32 trupa të pajetë janë dërguar në morg nga ndërtesa e djegur, ndërkaq 14 persona të tjerë që nuk kanë shfaqur shenja jete, ishin në mesin e 55 personave të dërguar në spital.

Pas lokalizimit të zjarrit, autoritetet kanë nisur kërkimin e të mbijetuarve apo të të vdekurve të tjerë.

Shkaqet e zjarrit ende nuk janë zbardhur, porse dëshmitarët e rastit kanë thënë të kenë dëgjuar një shpërthim të fuqishëm rreth orës 3 të mëngjesit.

Ndërtesa është ndërtuar para 40 vjetësh. Katet e poshtme ishin shndërruar në dyqane, të cilat janë bërë shkrumb e hi.

10:55

Së paku 24 të vdekur e 79 të lënduar pas një zjarri në një bllok ndërtesash në Tajvan

Së paku 24 persona kanë vdekur dhe disa të tjerë kanë marrë lëndime serioze pasi një bllok i ndërtesave u përfshi nga zjarri në Tajvan.

Banesat u përfshinë nga zjarri në qytetin e Kaohsiungut në orët e para të mëngjesit të së enjtes thanë zyrtarët.

Zjarrfikësve u mori më shumë se katër orë kohë për ta shuar zjarrin.

Departamenti i zjarrit i ka thënë se BBC-së se 79 persona janë dërguar në spital përfshirë 14 të cilët janë në gjendje serioze.

Shkaqet e zjarrit janë të paqartë dhe hetuesit janë në vendin e ngjarjes.