Zyra e Prokurorit të Qarkut të St. Louisit po heton një incident të regjistruar në video me një telefon ku policë lejuan një qen policie ta kafshonte në vazhdimësi një burrë zezak gjatë arrestimit. Videoja e arrestimit ka nxitur zemërim në internet.
Prokurori Wesley Bell ka thënë se zyra e tij “është e njoftuar për videon dhe do të rishqyrtojmë këtë incident”.
Policët në Woodson Terrace u njoftuan në mëngjesin e të hënës se një burrë ishte futur në një biznes. Policia tha se ai dukej se ishte nën ndikimin e drogës, kishte kërcënuar se do vriste policët dhe se kishte tentuar të ikte nga ata. Shtoi se tentuan ta arrestonin por ai rezistoi, duke nxitur një paralajmërim se një qen policie do thirrej nëse nuk do të bashkëpunonte. Kur burri vazhdoi të rezistonte, duke i shkaktuar lëndime një polici, qeni u lëshua, raporton AP.
Videoja tregon qenin kur kafshon këmbën e tij ndërsa burri bërtet nga dhimbja. Ai mbahet nga dikush dhe është i lidhur me zinxhirin, por lejon që të vazhdojë ta kafshojë për rreth 30 sekonda.
Pasi një polic e heq qenin, burri duket se bën një hap për të ikur por pengohet, dhe qeni i gjuhet sërish, kësaj radhe duke i kafshuar këmbën për 30 sekonda të tjerë derisa polici e ndal. Më pas ia vënë prangat, kurse i arrestuari shihet se mezi ecë.
© KOHA.
