Gjashtë muaj pasi ka marrë pushtetin në duar, lideri i ushtrisë në Birmani, Min Aung Hlaing, ka ripërsëritur të dielën zotimin e tij për mbajtje të zgjedhjeve të reja, brenda dy vitesh, dhe për bashkëpunim me kombet e Azisë Jugore për të gjetur një zgjidhje për vendin e tij.
“Duhet të krijojmë kushte për të mbajtur zgjedhje të përgjithshme, të drejta dhe të lira”, ka thënë gjenerali ushtarak në një adresim përmes televizionit.
“Duhet të bëjmë përgatitjet. Zotohem për mbajtje të zgjedhjeve të përgjithshme pa dështim”, është shprehur Aung Hlaing.
"Autoritetet ushtarake do të përmbushin dispozitat e gjendjes së jashtëzakonshme deri në gusht të vitit 2023", ka thënë ai.
Gjendja emergjente në Birmani ishte shpallur kur trupat ushtarake atje kishin bërë lëvizje kudër lideres së zgjedhur Aung San Suu Kyi, më 1 shkurt të këtij viti. Ushtria kishte zhvilluar atë ditë aksionin e marrjes së shtetit në duar me arsyetimin se zgjedhjet të cilat i kishte fituar Suu Kyi nuk ishin të drejta.
Qindra njerëz kanë mbetur të vdekur që atëherë në protestat që kanë zhvilluar qytetarët në qytete të ndryshme në Birmani, kundër grusht-shtetit.
© KOHA. Të gjitha të drejtat janë të rezervuara.
