Një burrë i pajisur me një thikë të gjatë ka vrarë të premten tre persona dhe ka lënduar rëndë disa të tjerë në qytetin jugor gjerman Wuerzburg, para se të qëllohej me armë zjarri dhe të arrestohej nga polici, kanë bërë të ditur autoritetet gjermane.
Nuk dihet ende se sa persona kanë pësuar lëndime në sulmin që ndodhi në pjesën qendrore të qytetit bavarez.
Policia ka identifikuar të dyshuarin si një somalez 24-vjeçar që jetonte në Wuerzburg. Jeta e tij nuk ishte në rrezik nga lëndimi i pësuar prej të shtënave policore, ka bërë të ditur shërbimi policor.
Sulmuesi i dyshuar ishte vënë nën trajtim psikiatrik para se ta ndërmerrte sulmin dhe ishte i njohur për policinë, ka thënë zyrtari kryesor i sigurisë në Bavari, Joachim Herrmann.
Videot e postuara në rrjetet sociale kanë shfaqur pamjet e kalimtarëve të rastit që kishin rrethuar sulmuesin dhe po e mbanin atë të palëvizshëm me karrige dhe shkopinj.
Një grua, e cila ka thënë të ketë qenë dëshmitare e rastit, ka shpjeguar për televizionin gjerman RTL se policia ka mbërritur në vendin e ngjarjes pak kohë më vonë.
“Ai e kishte me vete një thikë përnjëmend të madhe dhe po i sulmonte njerëzit”, ka thënë dëshmitarja Julia Runze. “Dhe më pas shumë njerëz u munduan që të hidhnin drejt tij karrige apo çadra dhe telefona celularë dhe më në fund e ndalën. Policia mandej i ishte afruar dhe mendoj se kanë shtënë drejt tij, këtë gjë mund ta dëgjonit qartazi”.
Zëdhënësja e policisë, Kerstin Kunich, ka thënë se policia ishte informuar rreth orës pesë të pasdites rreth një sulmi me thikë në Sheshin Barbarossa, në qendër të qytetit.
Guvernatori i Bavarisë, Markus Soeder, ka shprehur shokimin e tij mbi ngjarjen nëpërmjet një postimi në Twitter.
“Bashkëndiejmë me viktimat dhe familjarët e tyre”, ka shkruar ai.
Policia ka bërë të ditur në Twitter se nuk ka më rrezik për popullatën. Ndërkaq u ka kërkuar përdoruesve të rrjeteve sociale që të mos spekulojnë mbi ngjarjen.
Mediat gjermane kanë cituar disa burime policore që kanë thënë se nuk ekzistojnë indikacione për ndonjë sulm me motive terroriste.
Wuerzburgu është qytet me rreth 130.000 banorë, i cili ndodhet midis Munihut dhe Frankfurtit.
© KOHA. Të gjitha të drejtat janë të rezervuara.
