1 perditesime
21:59

Palestinezët anulojnë marrëveshjen e shkëmbimit të vaksinave me Izraelin

Palestinezët kanë anuluar marrëveshjen me Izraelin, sipas së cilës, ky i fundit do t’u jepte palestinezëve 1 milion vaksina anti-COVID.

Sipas Autoritetit palestinez, vaksinat të cilat kanë arritur nga Izraeli janë shumë afër datës së skadimit.

Sipas marrëveshjes, edhe palestinezët do të duhej t’u kthenin izraelitëve një sasi vaksinash kur atyre tu mbërrinte kontingjenti i vaksinave Pfizer, nga fundi i këtij viti.

Mirëpo, tani palestinezët e kanë anuluar marrëveshjen e shkëmbimit duke deklaruar se vaksinat kishin shumë pak afat të përdorimit.

17:32

Izraeli do t’u japë palestinezëve 1 milion doza të vaksinës anti-COVID

Izraeli do t’i dërgojë Autoritetit Palestinian të paktën 1 milion doza të vaksinës anti-COVID, në kuadër të marrëveshjes për të shkëmbyer doza, kanë bërë të ditur autoritetet izraelite.

Sipas marrëveshjes, edhe Autoriteti palestinez do të duhet t’i japë Izraelit një sasi të dozave nga kontingjentet e vaksinës që pritet t’i marrë nga fundi i këtij viti.

Rreth 55% të izraelitëve u janë dhënë të dy dozat e vaksinës, si pjesë e kampanjës së vaksinimit masiv, pasi shteti deri më tani ka pranuar miliona doza të vaksinës Pfizer – BioNTech.

Ndërkohë, rreth 30% të palestinezëve që jetojnë në Bregun Perëndimor dhe në Gaza, kanë marrë të paktën njërën dozë të vaksinës, kanë bërë të ditur zyrtarët palestinezë.

Marrëveshja e cila përfshin 1-1.4 milionë doza të vaksinave është bërë i ditur nga zyra e kryeministrit të ri të Izraelit, Naftali Bennett, i cili është betuar të dielën e shkuar, duke zëvendësuar kështu Benjamin Netanyahun i cili ka qëndruar në këtë pozitë për 12 vjet.