Johnsoni hap samitin e G7-s duke kërkuar ndërprerjen e pabarazisë

Samiti i G7-s ka nisur në Cornwall të Britanisë së Madhe derisa kryeministri britanik, Boris Johnson e ka hapur atë duke kërkuar nga liderët botërorë pjesëmarrës në këtë samit, që të “ndërtojnë botën më mirë se që ishte”, duke iu referuar rikuperimit nga pandemia me COVID-19.

Johnson ka deklaruar me këtë rast se është jetësore që të merren mësime nga gabimet e krizës financiare të vitit 2018 dhe të ndërpriten pabarazitë.

Liderët e shtatë ekonomive më të zhvilluara në botë, janë fotografuar së bashku për foton tradicionale të samitit, i cili këtë radhë po mbahet në resortin bregdetar Carbis Bay të Cornwallit.

Shpërndarja e vaksinave kundër COVID-19 është një prej temave kyçe që do të dominojë agjendën e samitit.

Presidenti amerikan, Joe Biden, është në mesin e liderëve që ka mirëpritur në vendin e tij kryeministri britanik, Boris Johnson, e po ashtu edhe liderët e Francës, Gjermanisë, Italisë, Japonisë dhe Kanadasë.

Ky është takimi i parë i G7-s që kur bota po përballet me pandeminë me koronavirus. Pjesëmarrës në samit janë edhe presidentja e Komisionit Evropian, Ursula von der Leyen dhe ai i Këshillit Evropian, Charles Michel.

Liderët evropianë kanë mbajtur një takim të përbashkët sot në Londër, në prag të zhvillimit të Samitit G7 që do të zhvillohet për tri ditë radhazi në Britani të Madhe.

Presidentja e Komisionit Evropian, Ursula von der Leyen, presidenti i Francës, Emmanuel Macron, presidenti i Këshillit Evropian, Charles Michel, kancelarja e Gjermanisë, Angela Merkel dhe kryeministri i Italisë, Mario Draghi, zhvilluan së bashku një takim në një tavolinë jashtë, në vendin bregdetar Carbis Bay, ku do të zhvillohet samiti.

Kjo është hera e parë që liderët e G7-s po mblidhen që kur Britania e Madhe ka dalë nga Bashkimi Evropian.

Von der Leyen ka shkruar në Twitter se ky ishte një takim i shkëlqyeshëm dhe se fokusi kryesor gjatë diskutimeve ishte pandemia me COVID-19 dhe Kina.

Michael ndërkohë ka shkruar në Twitter se multilaterizmi është kthyer, duke shtuar se Bashkimi Evropian dëshiron të shohë “botën të vaksinuar sa më shpejtë që është e mundur”.

Ndërkaq, presidenti francez, Macron ka publikuar në Twitter një fotografi nga takimi ku ka shkruar “Si gjithnjë, bashkimi i njëjtë, e njëjta vendosmëri për të vepruar, i njëjti entuziazëm”.

Liderët e G7-s janë fotografuar së bashku para fillimit të Samiti ndërkohë që temat kryesore për të cilat pritet të diskutohet do të jenë ndryshimet klimatike dhe pandemia me COVID-19.

© KOHA. Të gjitha të drejtat janë të rezervuara.