1 perditesime
19:31

Me rezultat të ngushtë, Zvicra ndalon mbulimin e fytyrës

Bern, 7 mars (AP) - Zvicra ka votuar në favor të ndalimit të mbulimit të fytyrës, përfshirë nikabin dhe burkën që përdoret nga myslimanet. Në referendumin e mbajtur të dielën, zviceranët votuan me 52 për qind për ndalimin, ndërkaq 48 për qind votuan kundër kësaj ndalese. Referendumin e organizoi partia ekstreme SVP”, që bëri fushatë nën sloganin “Ndal ekstremizmit”.

Grupi kryesor i myslimanëve në Zvicër e ka cilësuar referendumin si “ditë të errët” për komunitetin mysliman në shtetin helvetik.

“Vendimi i sotëm hap plagë të vjetra dhe zgjeron pabarazinë. Dërgon mesazh të qartë të përjashtimit të minoritetit mysliman”, thuhej në reagimin e Këshillit Qendror të Myslimanëve.

Qeveria zvicerane ishte shprehur kundër ndalesës, duke u arsyetuar se nuk ishte në dorën e shtetit që të caktonte se çfarë duhet të veshë gruaja.

Sipas një hulumtimi nga Universiteti i Lucernit, gati askush në Zvicër nuk mban burka, ndërkaq rreth 30 për qind të grave mbajnë nikab. Rreth 5 për qind e popullsisë së Zvicrës, prej 8.6 milionë banorësh, janë myslimanë, shumica nga Turqia, Bosnja dhe Kosova.

Pas kalimit të referendumit, mbulimi i fytyrës nëpër hapësira publike, si restorantet, stadiumet sportive dhe në transportin publik, do të jetë i jashtëligjshëm. Do të ketë përjashtime për objektet fetare, për shkaqe sigurie dhe shëndetësore. Autoritetet do të kenë dy vjet kohë që ta përpilojnë në tërësi këtë ligj.

Qeveria zvicerane e ka kundërshtuar këtë propozim, duke thënë se mbulimi i fytyrës është çështje margjinale. Ka argumentuar se kjo masë do ta dëmtonte turizmin – shumica e grave që mbajnë shami në Zvicër janë vizitore nga shtetet e Gjirit që pëlqejnë liqenet zvicerane. Ndërkaq përkrah masën që njerëzit ta shfaqin fytyrën e tyre në rast se ua kërkojnë autoritetet.

Përkrahësit e kanë nisur këtë propozim para pesë vjetësh dhe vazhdimisht e kanë quajtur si “ndalesë të burkas”.

Ata kanë argumentuar se mbulimi i tërësishëm i fytyrës simbolizon shtypjen e grave dhe thonë se masat janë të nevojshme për ta mbajtur gjallë principin e një shoqërie të lirë në Zvicër.

Në referendumin e së dielës nuk është përmendur islami direkt dhe gjithashtu kishte synim parandalimin e protestave të dhunshme. Sidoqoftë, gjatë tërë fushatës, vota ishte referuar si “ndalesë e burkës”.

Pak ditë para referendumit, Walter Wobmann, drejtor i komitetit për referendum, mbulimin mysliman të fytyrës e quajti si “simbol për këtë politikë islame ekstreme që është bërë e njohur në Evropë dhe që nuk ka vend në Zvicër”.

“Në Zvicër tradita jonë është që ta tregojmë fytyrën. Kjo është shenjë e lirive tona bazë”, kishte thënë ai.

Mbajtja e shamive islame në publik është temë e shumëpërfolur në shtetet evropiane. Franca ndaloi mbulimin e plotë të fytyrës në vitin 2011 ndërkaq Holanda, Danimarka, Austria dhe Bullgaria kanë ligje që ndalojnë plotësisht ose pjesërisht mbulimin e fytyrës në hapësira publike.

09:33

Zvicra sot voton mbi propozimin për të ndaluar burkën

Votuesit zviceranë vendosin sot mbi një propozim për të ndaluar mbulesat e plota të fytyrës në vende publike, si nikabet dhe burkat, që mbajnë gratë myslimane.

Sondazhet tregojnë për një rezultat të ngushtë.

Ligji nuk do të lejonte mbulimin e fytyrës në vende publike si restorante, stadiume sportive, transport publik ose thjesht ecje në rrugë.

Do të kishte përjashtime në vendet fetare dhe për arsye sigurie ose shëndetësore, të tilla si maskat e fytyrës, që njerëzit tani i mbajnë për t’u mbrojtur nga COVID-19, si dhe për festimet tradicionale të Karnavaleve. Autoritetet do të kenë dy vjet për të hartuar legjislacionin e detajuar, njofton AP.

Qeveria zvicerane e kundërshton këtë ligj dhe ka thënë se njerëzit që mbulojnë fytyrat e tyre e bëjnë për çështje "margjinale". Qeveria argumenton se ligji mund të dëmtojë turizmin pasi shumica e grave myslimane që mbajnë mbulesa të tilla në Zvicër janë vizitore nga shtetet e Gjirit Persik në shumicën e rasteve, që tërhiqen nga qytete bukolike të bregdetit zviceran.

Mbështetësit e propozimit, që vjen në votim pesë vjet pasi u përfol dhe u bë i njohur në mënyrë bisedore si "ndalimi i burkës", argumentojnë se mbulimi i të gjithë fytyrës simbolizon shtypjen e grave dhe ka thënë se ligji është i nevojshëm për një parim themelor që fytyrat duhet të shfaqen në një shoqëri të lirë si ajo e Zvicrës.

Dy nga 26 kantonet e Zvicrës, si Ticino dhe St. Gallen, tashmë kanë legjislacion të ngjashëm që parashikon gjoba në rast se haset në dikën që ka të mbuluar fytyrën. Legjislacioni kombëtar do ta vinte Zvicrën në përputhje me vendet si Belgjika dhe Franca që tashmë kanë miratuar ligje të ngjashme.

Mbështetësit e kësaj ideje përfshin Partinë Nacionaliste Zvicerane të Popullit, e cila është më e madhja në parlament dhe mbështetëse e ligjeve të tilla, si ndalimi i ndërtimit të minareve të reja që u votua në vitin 2009.