Presidenti turk Recep Tayyip Erdogan i ka quajtur terroristë studentët që po protestojnë tash e disa javë për zhvillimet e fundit në shtetin euro-aziatik.
Studentët dhe anëtarët e universitetit Bogazici kanë kaluar javë të tëra në protesta për emërimin e Melih Bulu në krye të universitetit, një akademik i cili dikur kandidoi për deputet me logon e partisë së Erdoganit.
Studentët kanë bërë thirrje që Bulu të japë dorëheqjen si rektor dhe që universiteti të lejohet të zgjedhë pasardhësin e tij, duke thënë se emërimi ishte një ofendim i lirive akademike.
Shumë studentë janë arrestuar mes protestave, madje disave u janë bastisur shtëpitë.
"Unë nuk i pranoj këta të rinj, të cilët janë anëtarë të grupeve terroriste, të ndajnë vlerat kombëtare dhe morale të vendit tonë", tha Erdogani në një video-fjalim.
"A jeni studentë ... apo jeni terroristë që përpiqen të bastisin zyrën e rektorit dhe ta pushtojnë atë?", shtoi Erdogani.
-
3 shkurt 2021 15:23
-
Shpërndaje në: