Botë

Bideni nxitet ta zgjasë afatin e ujdisë së armëve bërthamore me Rusinë

Bideni nxitet ta zgjasë afatin e ujdisë së armëve bërthamore me Rusinë
Foto: Reuters
 

Washington, 25 nëntor (Reuters) – Mbrojtësit e kauzës për kontrollimin e armëve kanë nxitur presidentin e zgjedhur Joe Biden që ta zgjasë afatin e ujdisë së fundit SHBA-Rusi për kufizimin e numrit të armëve strategjike bërthamore edhe pesë vjet të tjerë, ndonëse disa ekspertë kanë argumentuar se demokrati do të duhej ta bënte një gjë të tillë për afat më të shkurtër, ashtu që t’i mbante në duart e tij frerët me Moskën.

Menjëherë pas ardhjes në detyrë më 20 janar, Bideni do të ballafaqohet me vendimin urgjent nëse do ta zgjasë apo jo afatin e paktit “New START” të 2010-s, i cili do të skadojë vetëm 16 ditë më vonë, duke i lënë Washingtonin dhe Moskën të lira për të vendosur numër të pakufizuar të kokave strategjike dhe raketave bërthamore, si dhe nëndetëseve e bombarduesve për përdorim.