6 perditesime

Disa persona janë lënduar në qendër të Vjenës në një shkëmbim zjarri, ka njoftuar policia në Twitter të hënën në mbrëmje, me mediat lokale që raportojnë se një sinagogë është sulmuar.

23:38

Kancelari austriak thotë se të shtënat në Vjenë ishin “sulme të neveritshme terroriste”

Kancelari austriak, Sebastian Kurz, ka thënë se sulmet e së hënës në Vjenë, ishin “sulme të neveritshme terroriste”, duke shtuar se ushtria do të mbrojë hapësirat në kryeqytet ashtu që policia të fokusohet në operacionet anti-terroriste.

“Jemi duke përjetuar orë të vështira në republikën tonë. Dua të falënderoj të gjitha forcat e emergjencave që po rrezikojnë jetët e tyre për sigurinë tonë, sidomos sot. Policia jonë do të marrë veprime të prera kundër autorëve të këtij sulmi të neveritshëm terrorist”, ka shkruar ai në Twitter.

23:02

Zv.kryeministri Tahiri: S’ka kosovarë të lënduar në sulmin e Vjenës

Në sulmin me armë në Vjenë nuk është raportuar për ndonjë kosovarë të lënduar. Këtë e ka bërë të ditur zëvendëskryeministri i Kosovës, Besnik Tahiri.

“Ambasadori ynë, Lulzim Pllana e konfirmoi se stafi ynë diplomatik është i sigurt dhe se për momentin nuk ka ndonjë qytetarë të Kosovës të lënduar”, ka shkruar Tahiri në Facebook.

22:43

Në gjashtë lokacione të Vjenës pati sulme

Sulmet në Vjenë kanë ndodhur në gjashtë lokacione në qendër të qytetit, ka bërë të ditur zëdhënësi i Ministrisë së Brendshme për ORF.

Sipas tij, sulmet ndodhën në rrugët përreth sinagogës.

Në pamjet amatore që po qarkullojnë në internet shihet një person teksa gjuan me armë në drejtim të qytetarëve. Sulmuesi shihet se bart një çantë, ndërsa zëdhënësi i ministrisë nuk ka arritur të konfirmojë nëse kishte eksploziv.

Sipas ORF-së, si pasojë e sulmeve 15 persona janë duke u trajtuar në spitalet e Vjenës, me shtatë prej tyre me lëndime serioze.

 

 

22:16

Një i vrarë nga të shtënat me armë në Vjenë, disa të lënduar

Zëdhënësi i shërbimit ambulantor në Vjenë ka konfirmuar se një person ka vdekur në shkëmbimin e zjarrit të hënën në kryeqytetin austriak. Ai ka thënë po ashtu se disa persona janë lënduar.

Ka raportime se i vdekuri është një nga sulmuesit.

22:07

Ministri i Brendshëm austriak beson se sulmi në Vjenë ishte terrorist

Sulmi i së hënës në Vjenë besohet se është terrorist, me disa persona të lënduar e disa që besohet se kanë vdekur, ka thënë ministri i Brendshëm austriak, Karl Nehammer, për “ORF”.

“Për momentin mund të konfirmoj se ne besojmë se është sulm i dukshëm terrorist”, ka thënë ai.

21:44

Sulmi në Vjenë, ambasada kosovare fton qytetarët të qëndrojnë në vende të sigurta

Ambasada e Kosovës në Vjenë ka ftuar gjithë qytetarët që ndodhen në kryeqendrën e Austrisë, përkatësisht në zonën e qendrës, që të qëndrojnë të vende të sigurta.

Pak pas orës 20.00, në Vjenë raportohet për shkëmbim të zjarrit dhe hedhje të një bombe.

Mediat raportojnë për një të vdekur dhe shtatë të plagosur.

“Ambasada në Vjenë lut të gjithë qytetarët tanë që ndodhen në Vjenë, Zona Qendër (Bezirk 1.) të qëndrojnë në vende të sigurta. Policia austriake njofton se që nga ora 20.15 në qendër të Vjenës, janë dëgjuar të shtëna dhe ka të plagosur. Autoritetet po punojnë në zbardhjen e rastit. Lusim edhe njëherë të gjithë qytetarët në Vjenë të qëndrojnë ne vende të sigurta, në raste emergjente të telefonojnë policinë lokale ne numrin 133 apo në numrin emergjent të ambasadës: +43 676 7861865”, thuhet në njoftimin e Ambasadës së Kosovë në Vjenë, të postuar në Facebook.

21:29

Disa të lënduar në një shkëmbim zjarri në qendër të Vjenës

Disa persona janë lënduar në qendër të Vjenës në një shkëmbim zjarri, ka njoftuar policia në Twitter të hënën në mbrëmje, me mediat lokale që raportojnë se një sinagogë është sulmuar.

“Të shtëna me armë – ka të lënduar – qëndroni larg nga hapësirat publike dhe transporti publik”, ka thënë Policia.

Një zëdhënës i policisë ka bërë të ditur se një aksion i madh policor është duke u zhvilluar në qendër të Vjenës.

Gazeta “Falter”, ka thënë se një person është vrarë, duke cituar ministrin e Brendshëm. Ndërkaq gazeta “Kronen Zeitung” ka raportuar se një sinagogë është sulmuar.