Fëmijët mund të mos e përhapin koronavirusin aq sa të rriturit, kanë thënë dy epidemiologë të njohur të martën. Sipas tyre lajmi i keq është që imuniteti njerëzor mund të mos zgjatë aq shumë.

Në Evropë dhe SHBA njerëzit kanë nisur të kthehen në vendet e punës pas bllokimit që ishte vendosur për të parandaluar përhapjen e COVID – 19. Liderët botërorë tani po punojnë për të krijuar kushte që fëmijët dhe studentët të kthehen në shkolla e universitete.

Dr Rosalind Eggo, specialiste e sëmundjeve infektive në Londër ka thënë se ajo ka parë disa indikacione nga kërkimet se fëmijët mund të mos përhapin koronavirusin aq sa të rriturit.

“Ka të dhëna se fëmijët janë më pak infektues, por kjo nuk është e sigurt”, ka thënë Eggo, që është pjesë e panelit që këshillon qeverinë britanike lidhur me transmetimin e COVID – 19 te fëmijët dhe në shkollë.

Eggo ka thënë se për fëmijët që nuk shfaqin shenja të infeksionit është shumë e vështirë të thuhet se sa infektues janë. Sipas saj ka pak prova që ekziston mundësia e infeksionit më të vogël prej tyre.

“Na duhen më shumë studime për të vërtetuar këtë, pasi është shumë e rëndësishme”, ka thënë Eggo, raporton Reuters.

John Edmunds, anëtar i Grupit Këshillues Shkencor për Emergjenca, ka thënë se ishte befasuese se si dukej që fëmijët nuk luanin shumë rol në përhapjen e koronavirusit.

“Është e pazakontë që fëmijët duket se nuk luajnë rol të madh në bartje, pasi për shumicën e viruseve të frymëmarrjes dhe baktereve ata luajnë rol qendror”.

Të dy ekspertët kanë folur para një këshilli shkencor të parlamentit britanik.