NYT zbulon: Kina ka vrarë rreth 20 spiunë të CIA-s Foto: Getty Images / ilustrim

NYT zbulon: Kina ka vrarë rreth 20 spiunë të CIA-s

20 May 2017 23:50

Kina ka vrarë apo burgosur 18 deri në 20 burime të CIA-s nga 2010 deri më 2012, duke penguar kështu operacionet amerikane të spiunazhit në një të çarë masive të inteligjencës origjina e të cilave nuk është identifikuar, ka raportuar të shtunën gazeta “New York Times”.

Hetuesit mbeten të ndarë nëse ka pasur një spiun në CIA që i ka tradhtuar burimet apo nëse Kina ka hakuar sistemin e maskuar të komunikimeve të CIA-s, ka raportuar gazeta, duke cituar zyrtarë aktualë dhe të kaluar të SHBA-së, transmeton Reuters.

Kina ka vrarë së paku 12 persona që i kanë ofruar informata CIA-s nga viti 2010 deri më 2012, duke zhveshur një rrjet që janë dashur vite për t’u formuar, ka raportuar gazeta.

Njëri prej tyre ishte qëlluar dhe vrarë përball një ndërtese qeveritare në Kinë, i kanë thënë gazetës tre zyrtarë, duke thënë se kjo kishte qenë një porosi për të tjerët që punojnë me Washingtonin.

CIA nuk ka pranuar të komentojë kur është pyetur nga gazeta të shtunën, transmeton Koha.net.

Aktivitetet kineze nisën të shfaqeshin më 2010, kur agjencia amerikane e spiunazhit po pranonte informata shumë cilësore për qeverinë kineze nga burime brenda burokracisë, përfshi zemërimin kinez si pasojë e korrupsionit në Qeverinë e Pekinit, i kanë thënë NYT-it katër ish-zyrtarë.

Informatat nisën të zbeheshin kah fundi i vitit dhe burimet nisën të zhdukeshin në fillim të vitit 2011, thotë raporti.

Derisa gjithnjë e më shumë burime po vriteshin, FBI dhe CIA nisën një hetim të përbashkët për këtë të çarë, duke ekzaminuar të gjitha operacionet e zhvilluara në Pekin dhe të gjithë punonjësit e Ambasadës Amerikane atje.

Hetimi më në fund u përqendrua në një ish-operativ të CIA-s që kishte punuar në një divizion për mbikëqyrjen e Kinës, ka shkruar gazeta, por nuk kishin dëshmi të mjaftueshme për të arrestuar atë.

Disa hetues besuan se Kina kishte sulmuar sistemin e komunikimit të fshehtë të CIA-s.

Të tjerë mendonin se e çara erdhi si pasojë e një pune të pakujdesshme spiunazhi përfshi rrugët e njëjta të udhëtimit për të shkuar në pikëtakimet e njëjta apo takimet me burime në restorante ku kinezët kishin vendosur pajisje përgjimi, shkruan gazeta.

Deri më 2013, inteligjenca amerikane kishte arritur në përfundim se aftësia e Kinës për të identifikuar agjentët e saj ishte dobësuar, shkruan gazeta, dhe CIA është duke provuar të rindërtojë rrjetin e saj të spiunazhit atje.

© KOHA

Komentet

Shto koment

Të ngjashme