1 perditesime
11:48

Hungaria nis hetimet kriminale për aksidentin me varkë, 21 veta ende të pagjetur

Njëzetenjë persona konsiderohen ende të pagjetur, pas përmbytjes së varkës me turistë koreanojugorë në ujërat e lumit Danub të mërkurën vonë në kryeqytetin hungarez, Budapest, ka njoftuar të enjten policia vendore.

Adrian Pal, një zëdhënës i policisë, ka thënë gjatë konferencës për shtyp se varka me turistë u përmbyt pothuajse menjëherë pas përplasjes me një anije të madhe udhëtarësh, në njërën prej urave të lumit Danub, ka raportuar “Reuters”, transmeton “Koha Ditore”.

Bazuar në rrethanat, policia menjëherë i ka nisur hetimet kriminale rreth aksidentit.

Policia ka njoftuar po ashtu se mund të nevojiten disa ditë për nxjerrjen e varkës nga shtrati i lumit teksa nuk ka konfirmuar dhe as mohuar nëse mund të ketë edhe të vdekur të tjerë nga aksidenti. Përmbytja që ndodhi të mërkurën vonë ka lënë të vdekur së paku tetë veta, ndërkaq konsiderohen si minimale gjasat për shpëtimin e 21 turistëve të pagjetur koreanojugorë.

08:29

Shtatë të vdekur e 19 të zhdukur pas përmbysjes së varkës në Budapest

Të paktën shtatë vetë kanë vdekur dhe 19 janë zhdukur pasi një varkë u përmbys në lumin Danub, në kryeqytetin hungarez Budapest.

Agjencia e lajmeve “MTI” raportoi se 33 vetë, kryesisht turistë nga Koreja e Jugut, ishin në bordin e anijes kur u godit nga një anije tjetër ndërsa ankorohej.

Incidenti ndodhi të mërkurën rreth orës 22:00 të orës lokale.

Lumi Danub, një atraksion popullor për turistët, u rrit për shkak të reshjeve të mëdha, duke shkaktuar rryma të forta, shkruan ksp.

Varka që u përmbyt u identifikua si “Hableany”, ose “Mermaid”. Anija ka dy kuverta dhe një kapacitet prej 45 personash për udhëtime.

Ministria e Jashtme e Koresë së Jugut konfirmoi se 19 koreanë kanë humbur dhe njoftoi se do të niste drejt Hungarisë një delegacion zyrtar në lidhje me ngjarjen. Po ashtu, paralajmëruan se do të jenë në dispozicion të familjeve të viktimave për t’i mbajtur ata të informuar.

Duke folur në një konferencë për shtyp në kryeqytetin e Koresë së Jugut, Seul, një zëdhënës i agjencisë së udhëtimit pas turneut të grupit, Lee Sang-moo, tha se të paktën një fëmijë ishte ndër të zhdukurit.

Operacioni i shpëtimit vazhdoi në orët e hershme të së enjtes, me anije, zhytës, drita, dhe pajisje të tjera të përshtatshme.

Ekipet e emergjencës zbuluan rrënojat e “Mermaid” në shtratin e lumit, pasi kërkonin disa orë pranë Urës së Margaretës, thanë mediat lokale.

Ekipet e shpëtimit paralajmëruan se sa më shumë kohë të kalonte, rrymat e forta do të çonin njerëz në drejtim të rrymës, duke pakësuar shanset për gjetjen e të mbijetuarve.

Shërbimi Kombëtar i Emergjencave po bënte kërkime në drejtim të rrymës nga zona qendrore e Budapestit dhe trafiku ujor u ndal në të gjithë Danubin në jug të Budapestit, njoftoi agjencia e lajmeve Reuters.