Më 18 maj 2023 në proces të rigjykimit Naser Kelmendi është dënuar me 4 vjet e 8 muaj burgim, për trafikim me narkotikë.
Përveç dënimit, i cili përkon pothuajse me kohën e kaluar në paraburgim, gjasat që ky vendim të bëhet i formës së prerë, praktikisht duket të jenë të pamundura.
Kjo pasi vepra penale, për të cilën është dënuar Kelmendi, është përcaktuar me ligjin penal të Jugosllavisë të vitit 1977, i cili ligj ka qenë në fuqi në kohën e kryerjes së veprës penale. Kelmendi është dënuar për veprën penale nga 245 paragrafi 1 dhe 2 i ligjit në fjalë, ku thuhet se vepra penale: “Prodhimi dhe shitja” është e dënueshme nga 1 deri në dhjetë vjet. Në bazë të nenit 96 të këtij ligji, afati i parashkrimit relativ është 10 vite, derisa afati i parashkrimit absolut është 20 vite.
Në bazë të datës kur supozohet të jetë kryer kjo vepër penale, atëherë i bie se afati i parashkrimit absolut të kësaj vepre penale arrin në fund të muajit gusht të vitit 2023.
Sipas veprimeve dhe afateve procedurale, pas shpalljes së aktgjykimit sipas Kodit të Procedurës Penale, gjykata e shkallës së parë duhet që brenda 30 ditësh ta përpilojë aktgjykimin me shkrim. Nëse llogaritet ky afat, pra që nga shpallja e aktgjykimit deri në përpilimin e tij, data kur duhet të përfundojë përpilimi me shkrim i aktgjykimit është 18 qershori 2023.
Nëse brenda këtij afati nuk përpilohet aktgjykimi, atëherë kryetari i trupit gjykues mund të kërkojë afat shtesë për përpilimin me shkrim të aktgjykimit, plus 30 ditë në rastet kur lënda është e ndërlikuar.
Nëse kalkulohet edhe afati shtesë për përpilimin e aktgjykimit atëherë afati i fundit për përfundimin e përpilimit të aktgjykimit është 18 korriku 2023.
Kundër aktgjykimit të marrë nga gjyqtari i vetëm gjykues ose trupi gjykues i Gjykatës Themelore, ankesë mund të paraqesin personat e autorizuar brenda 30 ditëve nga dita e dorëzimit të kopjes së aktgjykimit, e që dorëzimi i kopjes së aktgjykimit siç edhe ka ndodhur në raste tjera vonohet edhe disa ditë të tjera, duke bërë që të reduktohet edhe më shumë numri i ditëve të mbetura për vendosje nga Gjykata e Apelit.
Në rast se pala e paraqet ankesën menjëherë, Gjykatës së Apelit i mbeten rreth 30 ditë, duke përfshirë pranimin edhe aspektet procedurale teknike, ku ankesa duhet t’i dërgohet palës kundërshtare për përgjigje në ankesë e afati për këtë veprim procedural është 8 ditë.
“Betimi për Drejtësi” ka kërkuar informata nga gjykatësja e rastit Suzana Qerkini nëse është përpiluar aktgjykimi me shkrim dhe sa a është në dijeni e njëjta se rasti i Naser Kelmendit parashkruhet në gusht të këtij vitit.
Në përgjigjën e saj gjyqtarja Qerkini ka thënë se aktgjykimin do ta përpilojë sa më shpejt që është e mundur, pasi e njëjta konsideron se është brenda afatit ligjor.
Tutje, e njëjta ka sqaruar se procesi gjyqësor ndaj Naser Kelmendit ka qenë i hapur dhe i monitoruar duke përfshirë edhe arsyet e shtyrjes së shqyrtimeve gjyqësore.
“Nëse gjykata deri në fund të muajit do dërgonte aktgjykimin e saj, që nuk e besoj fare, sepse tash do mbesin në stadin e harnimit, të arsyetimit, të asaj që në fakt nuk është as vepër, nuk duhet të ketë as dënim, atëherë i bie që ne e kemi qershorin, korrikun dhe gushtin. Secila palë i ka 30 ditë, me nejt në karrige e mos dorëzu ankesë, secila palë që e merr ankesën i ka edhe 15 të tjera për me dorëzu përgjigje që i bie 45 ditë, nga dita kur dorëzohet 45 ditë dhe i kalon filtrat i duhet edhe nja 5 ditë deri të mbërrin në gjykatën e Apelit. Nga dita kur mbërrin në gjykatën e Apelit duhet të shkoj te prokurori i shtetit, për të, prokurori i Apelit në fakt për të dhënë mendimin e tij. Nga dita kur jep mendimin prokurori, ndahet një numër, krijohet një Kolegj, është afati për ta thirre seancën e Kolegjit dhe deri në momentin kur ata e marrin vendimin, qofte edhe e votojnë vendimin do të ketë parashkrim”, ka thënë Besnik Berisha, avokati i Naser Kelmendit.
Për më shumë ndiqeni hulumtimin “Shteti dështon të ndajë drejtësi për Naser Kelmendin të njohur si “bosi i drogës”, i cili transmetohet në KTV, TV Arta dhe “Betimi për Drejtësi”.
© KOHA. Të gjitha të drejtat janë të rezervuara.
