Auto

Fordi po i jep fund modelit të famshëm

Fiesta do të hiqet nga linja e Fordit, sipas spekulimeve. Brendi pritet të publikojë më vonë gjatë kësaj jave planet për veturën e famshme.

“AutoExpress” ka raportuar të martën se një njoftim zyrtar i kompanisë pritet të dalë së shpejti. Aty thuhet se do të konfirmohet se vetura nuk do të jetë më në treg, prej mesit të vitit të ardhshëm.

“Jemi duke përshpejtuar përpjekjet tona për të shkuar drejt elektrifikimit të plotë dhe prandaj po e rishikojmë linjën e veturave në linjë me strategjinë tonë të biznesit. Ne nuk komentojmë spekulimet dhe do të japim më shumë informacione në muajt e ardhshëm”, ka thënë Fordi për “AutoExpress”.

Fordi është duke kaluar në tranzicion drejt linjës tërësisht elektrike dhe ka konfirmuar në mars sivjet se “vëllai” i madh i Fiestas, “Puma”, do të jetë në dispozicion si veturë tërësisht elektrike deri më 2024.

Sipas raportimit, Fiesta pjesërisht do të largohet edhe për shkak të kostos në rritje të prodhimit të veturave të vogla.

Fiesta ka qenë ndër modelet më të suksesshme të Fordit ndër vite, por së fundmi ka ngecur në marrjen e rezultateve pozitive te klientët.