Auto

Fordi do t’i investojë 3,7 miliardë dollarë për vetura të reja

Fordi njoftoi së fundmi një investim të ri prej 3.7 miliardë dollarësh në tri shtete amerikane për të ndërtuar një Mustang të ri, dhe për të rritur prodhimin e kamionëve dhe furgonëve, duke përfshirë modele të reja elektrike.

“Prodhuesi i automjeteve me bazë në Michigan do të investojë 2 miliardë dollarë në shtetin e tij të origjinës, një investim që do të krijojë 2.000 vende të reja pune”, bëri të ditur Fordi në një njoftim.

Fondet do të përdoren për të rritur prodhimin e automjeteve elektrike F-150 Lightning, të ndërtuar në një fabrikë pranë selisë qendrore të Ford-it në Dearborn, në 150.000 kamionë në vit.

Fordi ka rreth 200.000 para-porosi për kamionin tashmë, ka thënë kompania, dhe shembujt e parë iu dorëzuan klientëve javën e kaluar.

Paratë do të shkojnë gjithashtu në prodhimin e një kamioni të ri, të ridizajnuar të madhësisë së mesme të Ford Ranger në një fabrikë në Wayne, Michigan, si dhe një Ford Mustang të ri në Flat Rock, Michigan, megjithëse kompania nuk ka ende plane të detajuara nëse Mustangu tjetër do të ketë një version elektrik. Ndërkohë, 35 milionë dollarë shtesë do të shkojnë për të krijuar një qendër të re shërbimi ndaj klientit dhe për paketimin që do t'i dërgojë pjesët e automjeteve direkt te klientët.

Fordi do të shpenzojë 1.5 miliardë dollarë në fabrikën e tij të montimit në Ohio për të ndërtuar një "makinë të re komerciale elektrike" që do të prezantohet rreth vitit 2025. Kompania gjithashtu do të investojë rreth 100 milionë dollarë në një fabrikë motori.

Në Misuri, Fordi po shpenzojë 95 milionë dollarë për të prodhuar furgona komercialë Transit me energji me gaz, dhe furgona elektrike E-Transit.

Sipas Ford-it, investimet e reja pritet të krijojnë 6,200 vende pune. Për më tepër, Fordi do të shpenzojë 1 miliard dollarë të tjerë gjatë pesë viteve të ardhshme për të përmirësuar mjedisin e vendit të punës në fabrikat e tij, tha prodhuesi i automjeteve, duke përfshirë ndriçimin më të mirë dhe instalimin e karikuesve EV në parkingje.