Tesla bëri të mërkurën eksportet e saj të para nga Kina që nga rihapja e fabrikës në Shangai më 19 prill, pasi një dërgesë prej 4.767 veturash u nis për në Slloveni, raportoi media e mbështetur nga qeveria Shanghai Observer.
Transportuesi i automjeteve Glovis Splendor u largua nga porti herët të mërkurën, me destinacion portin slloven të Koperit, sipas gazetës me bazë në Shangai.
Tesla do të dërgojë edhe 4.100 vetura të premten. Prodhuesi i automjeteve synon të eksportojë 300 mijë vetura nga Shangai në vitin 2022.
Dërgesa pasqyron përpjekjet e Teslas për të kthyer operacionet në nivele normale në fabrikën e saj në Shangai, e cila prodhon Model 3 dhe Model Y për shitje në Kinë dhe për eksport.
Tesla nuk eksportoi asnjë Model 3 ose Model Ys të prodhuar në Kinë nga fabrika e Shangait në prill, ka thënë të martën Shoqata e Veturave të Pasagjerëve të Kinës, pasi politikat e Kinës për zero-COVID ndërprenë prodhimin dhe dërgesat.
Shitjet e kompanisë në Kinë ranë 98% në prill nga një muaj më parë, treguan gjithashtu të dhënat.
Rihapja e fabrikës më 19 prill u krye me ndihmën e qeverisë së Shangait dhe u mbulua gjerësisht nga media shtetërore kineze. Ishte si shembull se si qyteti po përpiqet të mbajë biznesin të hapur ndërsa ndjek një politikë të ashpër COVID.
Tesla prodhoi 10.757 vetura në fabrikën e saj në Shangai nga rihapja e saj më 19 deri më 30 prill, dhe kishte vendosur një objektiv për të arritur një prodhim ditor prej 2.600 automjetesh në ditë nga 16 maji.
© KOHA. Të gjitha të drejtat janë të rezervuara.
