-
Nga:
Marigona Brahimi
- 2 maj 2023 21:16
- Shpërndaje në:
Gjithsej 600 mijë euro ka ndarë sivjet Qeveria për funksionalizimin e projektit për mbikëqyrjen elektronike të personave të cilëve, me urdhër të gjykatës, iu kufizohet liria e lëvizjes.
Në Lëvizjen FOL thonë se marrë parasysh sistemin e kushtueshëm qendror të gjurmimit dhe byzylykëve elektronikë, këto mjete janë të pamjaftueshme.
“Duke marrë parasysh vlerën e madhe që kanë byzylykët elektronikë, si dhe numrin e madh të byzylykëve elektronikë që do të duhej të viheshin në përdorim, kostoja prej 600 mijë eurosh është tepër e vogël për të arritur qëllimin e implementimit të këtij projekti”, tha Albana Hyseni nga FOL.
Mbikëqyrja elektronike parashihet të bëhet për personat që gjykata ua ka vendosur masën e sigurimit të pranisë së tyre, si dhe ndaj atyre që gjykata ka vendosur urdhra mbrojtës.
Ndonëse Ligji për mbikëqyrjen elektronike të personave që u kufizohet lëvizja me vendim të gjykatës ka hyrë në fuqi më 2015, autoritetet ende nuk kanë shpallur tender për t’i blerë pajisjet që sigurojnë këtë mbikëqyrje.
Në Ministrinë e Brendshme nuk treguan për koston dhe e referuan KOHËN në Polici, për të marrë informacione në lidhje me projektin. E, në Polici vetëm thanë se do të ndërmerren veprime për implementimin e projektit.
Pas ndarjes së mjeteve financiare nga Qeveria e Kosovës për projektin “Sistemi i monitorimit elektronik”, bazuar në Ligjin për mbikëqyrjen elektronike të personave të cilëve u kufizohet lëvizja me vendim të gjykatës, Policia e Kosovës sipas autorizimeve dhe kompetencës do të ndërmarrë veprimet e nevojshme për këtë projekt dhe implementimin e tij, sipas Udhëzimit Administrativ të MPB-së Nr. 11/2016.
Ndërkaq Këshilli Gjyqësor i Kosovës bëri të ditur se për vitin e kaluar gjykatat kanë lëshuar 1 mijë e 333 urdhra mbrojtës, tek të cilat raste do të aplikohej mbikëqyrja elektronike.
E, në shoqërinë civile përmenden rastet specifike ku implementimi i projektit do të ishte tejet i dobishëm.
“Mbikëqyrja elektronike do të ishte thelbësore për mbrojtjen e viktimave të krimit në përgjithësi, e në veçanti të viktimave të dhunës në familje”, tha Hyseni.
Byzylyku apo hallka elektronike vendoset në kyçin e këmbës së të pandehurit dhe dërgon sinjale në sistemin qendror të gjurmimit, nga ku monitorohet nëse personi i caktuar del jashtë perimetrit apo hapësirës së lejuar.
Përveç largimit nga zona e lejuar apo hyrja në zonën e ndaluar, dhomës operative në Drejtorinë e Përgjithshme të Policisë do t’i dërgoheshin sinjale edhe kur pajisja dëmtohet, tentohet të hiqet, lëvizet, apo nëse nuk është e lidhur me energjinë elektrike.
