-
Nga:
Rrezon Gashi
- 22 nëntor 2023 11:24
- Shpërndaje në:
Në seancën e së mërkurës për rastin e njohur si “53-milionëshi”, ku ndër të tjerë është i akuzuar edhe ish-ministri i Infrastrukturës, tani deputet i AAK-së, Pal Lekaj, kanë munguar dëshmitarët.
Në sallë nuk janë paraqitur për të dëshmuar Georgios Papaioannou, përfaqësues i kompanisë “Hill International”, menaxherja e projektit të autostradës Arbën Xhaferi dhe Riyadh Alkhazrahi, përfaqësues i “Bechtel&Enka”.
Prokurori Atdhe Dema ka kërkuar që si dëshmi të pranohet intervistimi i tyre në polici në vitin 2019, për shkak të pamundësisë që t'i sjellin dëshmitarët në Kosovë.
Nga mbrojtja kanë insistuar që të dëgjohet dëshmia e tyre, “pasi kanë pyetje që duan t'i shtrojnë dëshmitarëve”.
Gjyqtarja e rastit ka refuzuar kërkesën e prokurorit Dema.
Në rastin e 53-milionëshit të akuzuar për keqpërdorim të detyrës zyrtare janë ish-ministri i Infrastrukturës, Pal Lekaj, Eset Berisha, këshilltar i lartë politik i Pal Lekajt, Nebih Shatri, ish-sekretar i Përgjithshëm në Ministrinë e Infrastrukturës (MI) si dhe Besim Tahirit, drejtor i Prokurimit Publik në këtë ministri.
Në seancën fillestare të mbajtur më 4 maj 2022, Lekaj dhe të tjerët ishin deklaruar të pafajshëm për veprën penale që iu vihet në barrë.
Prokuroria Speciale e Republikës së Kosovës (PSRK) më 4 shkurt 2022, ngriti aktakuzë ndaj Lekajt, Berishës dhe Shatrit.
Ndërsa, më 9 shkurt 2022, PSRK njoftoi se lidhur me këtë rast, më 8 shkurt është ngritur aktakuzë edhe ndaj Besim Tahirit.
Sipas aktakuzës së ngritur më 4 shkurt 2022 nga Prokuroria Speciale e Kosovës, Pal Lekaj, në cilësinë e ministrit të Ministrisë së Infrastrukturës (MI), Eset Berisha, këshilltar i lartë politik i tij, Nebih Shatri, si sekretar i Përgjithshëm në këtë ministri, në bashkëveprim dhe me dashje edhe me të pandehurin Besim Tahiri, drejtor i Prokurimit Publik në MI, akuzohen për keqpërdorim të detyrës zyrtare.
